上年因為見倒國泰做promo, 睇勻西班牙痴倒紅日之餘請一個禮拜已經可以黎個深度遊, 咁大個女都未去過歐洲, 一於將西班牙作為我搭進歐洲o既第一步 由於買倒平機票, 國泰來回直飛巴塞$4,524, 請左4日假, 在當地實際留左7.5日, 唔計買野最後每人用左$11,5xx, 非常抵玩 行程: Day 1: 香港>巴塞>加泰隆尼亞音樂宮>桂爾宮>巴特婁之家>魯營球場 Day 2: 巴塞: 桂爾公園>文森之家>聖約瑟市場>聖十字保羅醫院>聖家堂 Day 3: 馬德里>托雷多>馬德里 Day 4: 馬德里>塞哥維亞>馬德里>格拉納達 Day 5: 格拉納達>馬德里 Day 6: 巴塞: 米拉之家 Day 7: 巴塞: 畢卡索美術館>巴塞隆拿主教座堂>米羅美術館>海洋聖母聖殿 Day 8: 巴塞>香港 想慳錢, 除左要預先睇有冇平機票外, 亦有以下幾點要注意: 景點 西班牙國內好多景點都要預先網上購票, 門票仲唔平, 好似巴塞市內o既景點大部份都€10+, 預先網上訂票除左可以保証買倒門票仲可能會比o係現場買票平, 巴塞幾個出名o既景點都要預先mark定參觀時間, 另外, 有d景景點/美術館指定日子/時間可能會免費, 所以一買左機票就最好盡快plan左大約邊日會去邊個景點, 盡快買票 交通 哩度講緊o既係城市之間o既交通, 一般都分為內陸機, 火車或巴士, 講方便同舒服度, 一定係火車, 不過城市之間o既火車票價講緊€60-90/程, 冇返咁上下budget唔洗諗, 當然如果你預早睇, 有時可能會見倒有promo. 飛機比火車平少少, 但要預時間check-in同搭車去機場, 計落未必快得過火車, 建議有返咁上下時間o既遊客先諗內陸機. 最後巴士就一定係我地哩d窮遊人士首選, 時間當然會比火車慢, 車程大約多一半甚至一倍時間, 但價錢至少平一半, 而且某d地方仲有通宵巴士, 訓一覺就到, 慳返唔少時間, 好彩o既話有時亦會見倒超特價o既車票, 例如我就見過€5由西班牙南部o既格拉納達去北面o既巴塞, 舒適度方面, 如果有搭過國內o既長途巴士, 歐洲o既長途巴士相比起黎其實舒服好多, 車上有叉電, 椅背有mon上網同睇戲, 每幾個鐘亦有廁所位可以落車鬆下腳買下野食咁 食 西班牙最貴就係景點, 反而食方面唔算貴, 除非你去高級餐廳, 否則好多人氣食店都比香港平, 好似西班牙出名o既Tapas, 當地好多都係買一杯酒送一個tapas, 食物雖然冇香港o既西班牙餐廳咁精緻, 但味道都唔錯, 而且抵食好多, 通常一個人€10唔洗已經食到飽. 除左Tapas, 西班牙o既pizza都幾好食, 哩度o既pizza店通常以外賣為主, 店內都只係得幾個堂食位, 大大件pizza都係€3以內. 除左正餐, 搭長途車或平時都會食d零食飲下野咁, 哩d都可以o係當地o既超市補給, 麵包好多款都係幾毫子歐元一個, 大大枝野飲都係€1 住宿 除非一定要住酒店, 否則想平就只可以揀B&B或者hostel, 但B&B一般都要起碼3,4個人先住倒, 如果得1,2個人, 就只有hostel, 巴塞或馬德里o既床位一般都要HK$300/晚, 衛生程度可以接受, 雖然係share bathroom, 但好多都唔止得一個廁所, 所以基本上唔洗點等. 不過值得一提係, hostel一般都冇得免費寄存行李, 但可以俾錢叫hostel reception寄存或者有付費locker 治安 除左食住行之外, 去歐洲最多人關注一定係治安問題, 尤其巴塞據稱係全世紀最多扒手o既地方. 去之前, o係網上睇倒, 或有朋友同我講, 會有一堆小朋友圍埋黎, 趁你唔覺意偷你野, 或者有人扮問路或其他藉口, 走埋黎偷野, 更甚至用刀仔迫你去後巷打刧, 不過我成個旅程就冇預過, 但扒手就有遇過o既, 通常佢地都係趁你o係街行緊, 或停o係度等過馬路, 或企o係扶手電梯就打開你背囊, 我本身有用隱形腰包, 背囊係最classic o個隻款式(背囊內只有單反, 冇放錢), 8日裡面的而且確有3次俾人嘗試打開我背囊, 其中有2次係feel倒有人拉住我個袋, 有一次直頭完全冇感覺, 通常你擰轉面時, 佢地會扮冇時發生或同你講你個背囊俾人打開左(其實係佢打開), 但同行朋友個背囊係有個蓋蓋住, 就冇扒手試圖打開過, 所以個人覺得只要用隱形腰包或將背囊放前面或用側揹袋就ok, 扒手都係取易不取難, 唔洗過份擔心 最後, 先分享一d旅程o既精華相, 遲d先出返詳細遊記吧 點擊圖片放大 +16
