Day 1: 香港>清邁 幾年前Air Asia新開清邁航線, 以泰國櫻花o既相片做宣傳, o個時我先知清邁原來係有櫻花o既 雖然之前去日本旅行都見過櫻花, 但真正為左櫻花而去就未試過 追過櫻花o既都知道櫻花期好難捉, 所以最好就係趁有平機票先去, 捉唔倒都冇咁傷 如果想睇下年o既清邁櫻花, 而家睇定機票就差唔多喇 我就係前一年o既8月見HK Express今年一月櫻花期清邁來回機票連稅冇寄倉都係$855/人, 冇理由唔把握機會吧?! *********************** check in時, 問地勤可唔可以坐前d, 好好人俾左第一行我地, lucky~!!原本6:50pm落機, 遲左幾個字, 落機坐另一邊o既阿婆阿伯竟然爭落機, 好, 我讓你, 9秒9跑住超越佢地, 因為中間行錯路俾佢地超返前, 過完關後佢地竟然係去左拎行李, 咁你洗乜跑咁快呀????-,- 7:15pm終於出到機場 網上d人話而家雙條車唔俾泊機場, 佢地通常會泊遠d, 好好彩一出機場俾我地見倒哩架雙條車慢駛兜客, 得我地2個唔洗再等其他客即開, 開價100b/2人都無謂同佢講價喇, 因為仲要趕住趁電單車鋪閂門前去租電單車 2個人包晒成架雙條車, 又好彩冇塞車, 15mins就黎到清邁古城 我地一早book左哩間o係古城入面o既CozytelChiangmai, 7:30pm黎到放低行李房都未check in, 我地就要跑去電單車店, 因為佢8pm就閂門 等職員check passport期間快影旅館lobby 電單車鋪o係古城外, 由旅館行去要20mins, 7:50pm o岩o岩黎到 哩間Bamboo Bike位置比較隱蔽, o係巷仔入面, 車款亦唔多, 但因為聽講服務幾好, 所以我地就揀佢 哩度租車係以24hr為單位 最平o既小綿羊日租都係99b, 如果就咁o係古城入面渣都非常足夠 但我地要預渣倒上山, 所以就揀左哩架1100cc o既電單車, 日租250b, 另加2,000b按金或要留低passport, 因為我地未唱泰銖得好少錢, 所以就放低passport, 話聽日先黎俾按金 店員都好有耐性俾我地慢慢check清楚部車, 試渣下有冇問題同影清楚車身邊度有花痕, 簽好約俾左錢就搞掂 頭盎求其o係店門外自己揀就得, 個個頭盔都有d殘缺, 揀左個有擋風玻璃就起行 有左架電單車真係快好多, 8:20pm我地就黎到The Chef食晚飯 雖然佢寫收9pm, 但我地去到時佢已經掃緊地, 明明入面有冷氣, 走來走去熱到死都唯有坐出面 點擊圖片放大 價錢正常 金邊粉79b, 味道都唔錯 菠蘿炒飯129b o係The Chef食完正餐, 當要要去北門掃街 仲諗住1月o既清邁有櫻花會凍, 估唔到熱到出汗, 等我仲冇帶巴蕉扇黎, 真係老貓燒鬚 T_T 連中文都有就知有幾多遊客黎食 叫左個豬腳飯加雞蛋, 30b, 其實好細份, 不過試少少o岩喇, 而且都熱到戰鬥力大減, 豬腳好林 我對哩類甜品興趣不大, 所以都冇幫趁 黎大象國點可以唔食芒果糯米飯?! 50b已經有好多, 芒果夠甜, 糯米軟糯, 好味 食飽飽返旅館前再周圍逛下 Boots雖然平, 但因為冇買寄倉好多野都唔買得, 睇下就算 Boots對面仲有小老闆專門店, 哩個就o岩我好多, 不過因為之後都會去Big C, 所以就冇諗住買 點擊圖片放大 +3 9:40pm先返到旅館, 而家先得閒慢慢影下周圍環境 清邁周圍都有得租電單車, 連旅館都有 1,147b/晚, 乾淨整潔, 冷氣夠凍, 非常抵住, 不過我嫌張床林左少少 梳洗沐浴用品都齊晒, 水亦夠猛夠熱 房入面對布拖鞋好好著好舒服, 後尾o係夜市見倒有得賣都買左對 最衰係樽水開左蓋閂唔返 因為第2日要早起身, 所以11點幾就訓了
