Day 5: 耶路撒冷>馬撒大>死海>耶路撒冷 終於黎到行程另一個高潮位－死海, 行左幾日終於可以hea下~而馬撒大同死海屬於同一條線, 好多人都會一次過去埋, 馬撒大係一個有二千年歷史o既堡寨, 因為近幾十年先對外開放, 所以保存得非常之好, 都好值得去 雖然今日只係去馬撒大同死海兩個景點, 但因為車程長加上巴士班次唔算密, 所以6am就要起身, 6:40am已經出門, 天氣仲涼涼地, 好舒服 因為今日預左會搭多過2次輕軌, 所以買左Daily Pass(ILS$13.5) 搭左3個站去Mahane Yehuda站, 就係為左黎Teller Bakery買麵包做早餐陣間搭巴士食 哩度d麵包個個都人頭咁大個 點擊圖片放大 我地買左原味同朱古力味牛角包各一個(ILS$10/個) 買完麵包再搭多2個站黎Central Bus Station, 站外又有連鎖咖啡店Cofizz, 又買返杯iced choclate同iced kinder先(ILS$5/杯), 兩款朱味唔同, 但又講唔出有咩唔同, 個人就鍾意kinder多d 去馬撒大o既士巴差唔多1hr先有一班, 一早check左8am有巴士, 7:20am已經黎到 車票可以o係counter買, 車程2hrs, 車票ILS$37.5 每個站都有顯示屏睇倒巴士班次 睇下, 以色列境內(特別係耶路撒冷), 真係隨處都會見倒軍人 仲有時間, 食埋個包先 其實朱古力牛角包d朱古力都唔係特別多, 同普通牛角包都差唔多 7:50am已經可以上巴士, 因為486哩架巴士除左可以去倒馬撒大同死海, 仲可以去倒同一條線o既另外一兩個景點, 所以都幾多人搭 長途巴士良伴-薯片 馬撒大o係死海附近, 遠處哩個應該就係死海 之前o係超市買左7包薯片, 所以特登帶左2包上巴士食XDDD 今日去馬撒大預左要曝曬, 當然要帶大大枝水黎, 哩枝青蘋果水就o岩晒, 聞落有好大陣青蘋果味, 飲落就有少少甜咁 9:45am終於落車了 因為馬撒大就o係耶路撒冷同艾拉特(最接近以色列同約旦其中一個關口o既城市)中間, 所以估計左邊哩個女人係諗住去完馬撒大死海再經艾拉特去約旦, 要拖住咁大個o急搭巴士都唔難, 但要拖埋佢上山都真係勁*0* 遠處哩座就係馬撒大入口, 落左車仲要上10mins斜路先到 馬撒大堡寨就o係入口右手邊哩座山上面 沿住哩條斜路上去就係入口, 雖然只係短短10mins, 但曝曬冇遮陰, 都唔講得笑 沿住斜路上, 會見倒哩座Guest house, 佢係最近馬撒大o既旅館, 如果想o係馬撒大睇日出最好就係前一晚o係哩度過夜, 本來都有諗過睇日出, 但因為巴士尾班車太早, 行程趕唔切所以放棄 之前check過哩間guest house價錢唔貴, 估唔到仲幾新淨同景觀都幾好 終於黎到馬撒大o既入口, 睇真d佢個名, 佢其實係以色列o既國家公園, 因為佢2000年已經入左世遺 入到去, 首先感受倒o既係涼浸浸o既冷氣, o係出面曬到變人乾o既溫度入到黎真係正到無倫!! 第一件事當然係買飛先~!! 馬撒大開放時間由8am至5pm, 如果想睇日出o既旅客, 可以經蛇道行上山, 8am前都唔洗買門票, 但因為以色列9am後溫度會急升, 曾經有人o係蛇道死左, 所以9am打後蛇道都會關閉, 要上山就一定要搭纜車, 本來仲諗緊落山先行蛇道, 而家唯有買來回纜車加門票, ILS$74/人(淨門票ILS$28/人, 如果有買公園通票, 馬撒大同另外幾個景點都可以唔洗再買飛), 以世遺景點黎講, 都算抵玩了 雖然只係10am, 但都已經有幾多人 纜車每15mins一班, 基本上每班都企滿人 上面哩個就係落車站, 其實唔係好遠, 10mins內就到 下面右上角哩個就係頭先馬撒大o既入口, 中間o個條就係蛇道, 雖然話上山只係約40mins路程, 但要o係曝曬行下, 加上沿途冇特別野睇, 如果唔係為左睇日出, 都冇乜必要咁樣行上黎 馬撒大雖然只係一個440m高o既山, 但周圍都係荒漠, 景觀非常開揚, 仲見倒遠處o既死海 哩個就係纜車落車站, 沿住前面o既棧道行, 就係馬撒大堡寨 o係哩度都有以色列o既國旗 沿住樓梯而上, 就係堡寨 未上樓梯前, 左手邊有個帳篷, 下面有水洗手同飲用水, 而且仲係勁冰涼, 正呀!! 馬撒大堡寨雖然有近2000年歷史, 但因為弧高o既地理位置, 過左差唔多13個世紀先俾考古學家發現, 而且都係60年代先對外開放, 所以入面羅馬帝國古典建築風格o既設施都保存得幾好, 牆呀柱呀地下水道都仲好明顯 馬撒大堡寨除左保存得好, 佢o既歷史仲可以用壯烈黎形容, 話說當年羅馬統治左耶路撒冷, 大舉屠殺猶太人, 猶太人唯有避難到由暴君大希律王所建o既馬撒大堡寨, 貪佢易守難攻, 因為羅馬軍想攻上黎必定要經過狹窄o既蛇道, 但蛇道平排只企倒2個人, 攻左一年都未攻下羅馬軍就改變策略諗住圍城, 等猶太人斷水斷糧就會自動投降, 點知山上面有足夠糧水, 最後羅馬軍搵猶太奴隸起左一條通去城牆o既坡道, 可以破壞馬撒大o既防守, 死守左o係山上三年o既9xx個猶太男女知道守唔住, 寧願集體自殺都唔投降, 佢地自殺時仲故意燒剩一個儲藏室, 等羅馬軍知道佢地唔係因為缺糧而自殺, 而因為猶太傳統唔俾自殺, 佢地就揀左10個人做劊子手殺死自己人, 死剩最後o個個就自殺, 猶太人亦從此o係迦南高地絕跡, 去到70年前以色列立國, 猶太人先有返自己o既土地, 所以馬撒大o係猶太人心目中就代表左為自由而抗爭o既標誌 成個堡寨其實係一個兩層o既空中宮殿, 哩度係司令官o既住宅, 房間裡面仲見倒少少彩色o既磚 我身後面就係堡寨入面29個儲藏室, 當時希律王起黎係為左存放食物同武器 馬撒大堡寨有分東西兩個入口, 頭先搭纜車上黎o既係離耶路撒冷較近o既東邊入口, 而哩度就係近住艾拉特o既西邊入口, 由西邊入口行上黎大約15mins就上到 點擊圖片放大 咁曬咁熱o既堡寨上, 竟然有班雀仔會鍾意停o係度!!*0* o係堡寨其中一個建築入面, 竟然有個人o係一間玻璃房入面寫緊字, 唔知係咪就係駐守o係度抄寫古籍o既神職人員呢?! 堡寨範圍都幾大, 有宮殿, 有泳池, 有澡堂, 有儲藏室...... 點擊圖片放大 +6 如果要行晒成個堡寨至少都要2hrs, 但因為太曬太熱, 我地行左1hr就行返去帳篷下面邊休息邊等纜車搭返落去 我地帶上黎o既牛油果都熱到溶左, 諗住meet開d皮俾雀仔食, 佢地都唔吼 11:40am就搭返纜車落去 o係耶路撒冷幾日都唔見倒Ahava, 竟然o係馬撒大會有專門店!!!*0* 仲要咁大間, 有好多產品都有買3送1優惠, 不過由於本身都已經入左少少貨, 加上廢事拎, 所以都冇買到 事後發現價錢同機場買都係一樣, 而且仲要另外退稅, 所以都係留返去機場買好d 由馬撒大去死海, 同樣可以搭返486巴士, o係返頭先落車個站就得, 巴士都幾準時到, 預早少少到唔洗等好耐就有車, 車程15mins, 車費ILS$16/人 題外話, Egged bus冷氣唔單止夠勁, 車上仲有wifi同叉電添 o係Lot Hotel站落車, 行5mins就到Ein Bokek公共海灘 過左對面馬路, o係左手邊建築後面就係海灘 估唔到哩度又有Ahava!!*0* 終於黎到以色列境內其中一個死海公眾海灘Ein Bokek(另一個係Ein Gedi, 現正關閉中), 除左Ein Bokek, 以色列仲有幾個死海私人泳灘, 但因為一來要收費, 二來網上評價都毀譽參半, 我地梗係寧願去個唔洗錢o既 一大堆禁止乜乜乜, 就算睇唔明希伯來文同d圖示, 都一定睇得明禁止游水個標誌, 因為死海鹽份極高, d水係非常那眼o既, 所以哩度都唔可以游水, 個頭亦唔可以浸入去水入面, 而雖然冇人o係度游水, 哩度都一樣有救生員的 Ein Bokek同普通泳灘差唔多, o係度你係唔會見倒滿地o既死海泥, 因為以色列政府唔想遊客亂挖死海泥, 所以境內o既死海海灘全部都鋪晒細沙, 要搽死海泥就要o係附近o既店鋪度買(只有約旦境內o既海灘先有任挖死海泥) 死海雖然o係外國遊客眼中名氣極大, 但對當地人就唔係特別吸引, 加上可能因為六月已經踏入淡季, 同黎到時係正午1點, 所以遊客都唔多 死海o既中午比耶路撒冷更熱, 正午有4x度, 真係企耐少少都變人乾, 好彩沙灘有帳篷 沙灘椅係要另外租, ILS$15.張, 黎到o岩o岩有人走, 俾左2張沙灘椅我地, 不過我地都係用左1張要黎擺野 因為沙灘冇locker, 所以我地落水時就將放左背包o既沙灘椅拉去海灘當眼地方 問下附近d遊客邊度有得買死海泥, 佢地話紅色頂哩d手信鋪就有 仲以為死海賣o既死海泥會貴過出面, 竟然反而哩度係最多款同最平(我見倒之前我o係耶路撒冷買o既死海泥, 竟然哩度仲要平一半>.<) 之前見網上有人話機場有死海泥買, 唔需要o係度擔d泥返去, 但事後發現, 出返機場係得返名牌Ahava, 想買平價牌哩度都算齊全同平, 最平ILS$10/300g, 非常抵玩 想用靚野可以買Ahava, ILS$50/400g, 我地就平平地買左哩隻, ILS$15/600g, 已經夠2個人厚塗全身 趁落水前對手仲乾淨, 周圍影下相先 點擊圖片放大 +3 除左漂浮, 搽到成身泥都係哩度o既指定活動 特登山長水遠帶份報紙黎, 就係為左影哩張相, 影影下竟然仲有人問我地借份報紙黎影XDDD 以為死海鹽份高, 一浸落去就會浮起, 原來都要有d技巧, 我地份報紙就因為反艇浸濕左XDDD雖然份報紙浸濕左, 但後尾我地放上沙灘椅度, 竟然可以曬到脆左*0* 死海o既海水除左又鹹又苦澀同那眼(有時彈倒少少水花入眼都唔敢用手捽, 網上d人都建議遊客最好預備定樽淡水o係岸邊, 有咩事都可以立即沖洗), 身體浸落水第一個感覺係有傷口同你以為冇傷口o既地方都幾那, 旅程之前仲盡量避免有傷口, 點知最後都俾野咬抓到手腳都損晒, 好彩都冇想像中那得咁交關 因為眼同耳都唔可以入水, 所以浮起時個頭要傾向前, 但我地只係行到水深去到腰o既地方, 可能浮力唔係太勁, 所以都要放鬆先浮倒, 開頭驚住個頭浸左落水, 太緊張都反艇 浸完一輪, 係時候搽死海泥喇, 因為死海泥好杰身, 所以最好加少少水, 先易推 立即變黑晒亦得, 得左!!! 死海泥只要乾晒就可以沖洗, 因為哩度實在太曬, 基本上幾分鐘已經乾到有裂紋(我本身搽左110度防曬, 都可以曬到有d痛) 仲有d沙超辣腳, 加上哩度d沙都有d拮腳, 所以一定要著拖鞋 本身浸o係海水入面冇乜特別, 但上水會發覺身體有d油膩咁, 唔知係咪哩種油膩感加上死海泥, 用海水洗走左死海泥後, 皮膚真係會有種滑不溜手o既感覺 因為死海實在太曬, 基本上就算浸加搽泥, 一個鐘倒都夠晒(有人會建議日落時間黎, 但因為唔想太夜返耶路撒冷, 加上唔想正午最熱時間去馬撒大, 所以我地無可避免唯有正午時間黎死海), 哩個亭就有標示而家o既溫度 沙灘上面就有沖身設施, 有四個花灑頭, 水力非常猛, 沖一陣已經可以沖走晒d沙 其實用淡水沖乾淨後, 已經冇左頭先滑不溜手o既感覺 哩度冇指定o既更衣室, 想換衫可以去右邊o既公廁度換, 廁所入面算乾淨, 不過就冇掛勾, 比較手忙腳亂 網上資料話廁所要收ILS$2.5使用費, 但我地去到就唔見要收費, 同埋本來帶左毛巾黎抹身, 後來發現根本曬到未行到去廁所個身都已經乾, 最後求其用紙巾抹下就算 回程o係Spa Club Hotel對面就有486巴士返耶路撒冷Central Bus Station, 因為巴士站曬到應, 所以當然o係對面有樹蔭o既地方等, 巴士班次比較疏, 等巴士時都不時會見倒有的士兜搭d遊客 搭4:10pm o既巴士, 6:10pm終於返到黎Central Bus Station, 車費ILS$37.5, 哩個係Central Bus Station o既入口, 繁忙時間所有進入Bus Station o既人都要過安檢, 出就唔洗 之後搭輕軌去Mahane Yehuda站黎哩間Shalom Falafel食晚餐 哩間係一間外賣店, 只有幾個位坐 一個中東包已經夠兩個人食, ILS$15 食完中東包我地就去左附近o既Mousseline Ice Cream Parlour食雪糕 哩度o既雪糕都好多款 雪糕除左可以逐球買, 仲可以逐kg買 4款口味先ILS$25, 睇下真係好大杯, 估唔到仲平過香港, 質地比較黏, 唔易溶, 味道都好濃 食完就搭返輕軌返City Hall站, 去郵局寄埋之前寫左o既postcard o係街邊小超市買o既野飲(共ILS$13.8), 雖然比尋日去o既大型超市Rami Levy Supermarket貴, 但都已經平過Old City附近o既士多好多, 左邊係桃味水, 冇青蘋果味咁好飲, 右邊哩隻果汁就幾好飲
