Day 3: 耶路撒冷>伯利恆(馬槽廣場>聖誕教堂>聖凱薩琳教堂>母奶洞穴教堂>隔離牆)>耶路撒冷 原本今日係諗住繼續o係Old City附近逛, 但由於想早d可以返hostel睇下行李到左未, 所以我地就調左d行程, 改左今日只係去伯利恆 伯利恆唔單止係耶穌同大衛王o既出生地, 佢而家仲係巴勒斯坦其中一個城市, 所以除左幾個宗教景點外, 最出名就係包圍住伯利恆o既隔離牆 ******************* 今日要去伯利恆, 雖然車程唔耐, 但驚過關搞好耐, 想早去早回睇下夜晚可唔可以去機場拎返行李, 所以6:45am就出門了 尋日o係Old City行黎行去, 我地終於知道由hostel行出Old City外o既輕軌站最快係經New Gate, 行10mins就出到城外 輕軌線一眼睇晒, 無論搭幾多個站, 一律ILS$5.9 而家只係7am倒, 所以輕軌都冇乜人, 但每到黃昏時間, 輕軌就會迫滿人 特登搭三個站黎到Mahane Yehuda站, 就係為左黎哩間Marzipan Bakery買麵包, 麵包店7am開門, 我地7:15am已經黎到, 所以麵包先o岩o岩出爐逐d逐d拎出黎 哩度d麵包好多款, 其中最出名就係佢地o既朱古力包同蛋糕, 真係睇到我地雙眼發晒光呀!! 全部麵包都細細個可以試多幾款 朱古力蛋糕都有好多款呀, 就算冇得食睇見都興奮呀!! 點擊圖片放大 我地揀左d朱古力同比較特別o既包款陣間搭巴士去伯利恆食, 哩度夾埋ILS$16全部都係甜包, 有蘋果, 雲呢拿朱古力, 玉桂, 朱古力, 果仁, 其中最好味都係朱古力, 因為d朱古力真係好濃味 買完麵包我地就搭返輕軌返Old City(市內90mins免費轉乘, 所以返黎o個程輕軌係免費), 經過尋日本來想幫趁但冇開o既Hummus Acramawi, 見今日有開, 就順便試下 唔知係咪因為今日哩間開左門, 尋日我地幫趁隔離o個間即刻少左人幫趁 Hummus就係中間o個碟淺黃色o個隻醬, 通常食中東包都會蘸hummus, 而左邊o既係Falafel, 即係炸蔬菜球, 九成中東包都會有Falafel, 哩度夾埋ILS$22 食完我地就行返去Damascus Gate外面o既Arab Bus Station, o係哩度可以搭South Bus 231號去伯利恆(站牌仲未改, 仲寫住21號巴士, 但其實而家已經轉左做231號巴士) South Bus唔似Egged Bus有得網上check班次, 不過佢都好密, 7am至8:30pm每10mins就有一班, 上車購票, 車費ILS$6.8, 車程半個鐘, 架巴士都幾多人搭, 大部份都係去伯利恆o既遊客, 冷氣仲好夠凍tim 途中已經見倒高高o既隔離牆 車上冇報站器, 但可以叫司機提你落車, 不過其實都會有好多遊客o係度落車 一落車就會有的士(黃色o個部)司機走埋黎叫你包車, 開價USD$20車你去伯利恆幾個唔同景點, 再車返你返巴士站, 我地架巴士大部份o既遊客都有幫趁, 但做足功課加上慳到盡o既我地當然堅持用自己雙腳, 佢地有1,2個都跟左我地好耐, o係伯利恆o既景點同市集, 都會有好多司機拉客, 不過比起強國或東南亞o既司機, 佢地已經算係斯文 因為伯利恆係屬於巴勒斯坦, 所以消費都比耶路撒冷平好多, 落左車冇耐見倒有士多, 即刻入去買枝汽水, 咁大枝玉泉檸檬梳打都係ILS$4, 香港都唔得 伯利恆o既景點都比較集中, 都係o係馬槽廣場附近, 如果識路o既話其實由落車點行去都係大約10mins(估計落車站搬左位, 因為根據網上資料, 落車點距離馬糟廣場應該冇咁近), 但由於唔係一條直路可以行到, 所以我地都要問左2,3個人先去到 伯利恆同耶路撒冷一樣大部份都係石建築, 放眼望去, 差唔多每座建築都係哩種泥土色(包括比較新型o既建築) 點擊圖片放大 +3 馬槽廣場 馬槽廣場雖然唔係一個景點, 不過由於遊客中心就o係哩度, 加上對面就係聖誕教堂, 所以哩度都有唔少賣postcard同手信o既鋪頭, 不過價錢就會比較貴, 拍得住耶路撒冷 聖誕教堂 聖誕教堂係伯利恆最重要o既景點, 因為佢原址就係耶穌出世o既馬槽, 可以想像無論係咪教徒, 黎到伯利恆點都會黎朝聖下, 而且佢仲係現存仲有使用而最古老o既教堂之一 左邊哩個咁矮o既門就係聖誕教堂o既入口, 想入去o既人都要烏低身先入倒去, 所以又叫謙卑之門 哩個入口係後期改建, 據聞係當年基督徒係為左阻擋伊斯蘭教徒騎馬入去而改細o既 教堂內部因為進行維修, 所以有部份以圍板封住 點擊圖片放大 +2 欄杵後o既係馬廄聖壇, 要進入聖壇範圍, 女士同樣要著過膝o既裙或褲, 好彩我都早有準備 o係馬廄聖壇對面有條路行落去, 下面會見倒地下有粒星, 就係標示耶穌出世o既正確位置, 哩粒星有個名叫伯利恆之星, 好多人都會行埋去影相或者鍚下佢 點擊圖片放大 +3 聖凱薩琳教堂 o係聖誕教堂o既大殿有條路可以穿去哩間教堂, 哩間教堂係用黎記念為左反抗羅馬皇帝迫害基督徒而被殺害o既聖凱薩琳而建 修和室(即係睇戲有神父o係入面俾人懺悔o既地方)都好古典 o係教堂有條樓梯落去一個地牢, 哩度據講係聖耶利米o既書房山洞, 最初o既舊約聖經都係用希伯來文寫成, 而新約聖經就係用希臘文寫, 就係耶利米將聖經翻譯成拉丁文, 之後先陸續出現更多唔同語言版本o既聖經 哩個就係聖耶利米 點擊圖片放大 +4 我覺得哩條路有d似希臘 母奶洞穴教堂 原本冇諗住去哩個教堂, 不過見o係附近, 就順便入黎睇下 母奶洞穴教堂係一個奶白色o既教堂, 相傳約瑟一家人o係逃去埃及前曾經暫住哩個洞穴, 而瑪利亞o係餵母乳時, 奶汁滴左落黎所以就將洞穴變白, 當地o既基督徒都相信不孕或者有病o既人, 只要飲左哩個洞穴磨成o既粉再誠心祈禱, 都會好返 落去洞穴時, 會見倒哩個餵緊母乳o既瑪利亞雕像 點擊圖片放大 +2 睇完教堂, 我地又行返去馬槽廣場, 因為食lunch o既地方就o係哩附近 哩度雖然有遊客中心同郵局, 但原來因為伊斯蘭開齋節所以都冇開, 本來仲諗住o係度買postcard順便寄埋, 見廣場附近賣o既postcard雖然最多款, 但冇特別平又唔可以o係伯利恆寄, 所以最後都冇買 伯利恆比我地想像中快行完, 加上今日早起身, 所以11am就黎Afteem Restaurant食lunch 哩間餐廳係Tripadvisor推薦, 都幾多人黎食架 睇下, 坐滿人 哩間餐廳話晒都係o係馬槽廣場附近, 所以冇想像中咁平 左下係Hummus, 中上係Falafel Plate, 另外仲叫左薯條同Lemon Mint, 2個人都係食左ILS$45 Falafel雖然話係炸雜菜球, 但其實食落係完全唔覺油o既 食完lunch行出黎, 就見倒傳說中o既山寨Starbuck, 網上有人話覺得哩間店o既咖啡仲好飲過正牌Starbuck 其實沿路我地都見倒唔止一間山寨Starbuck, 不過就以哩間最似 雖然Starbuck係假o既, 但KFC就係真o既, 以色列都冇KFC, 但伯利恆竟然有!!*0* 但價錢同以色列o既消費一樣咁高, 仲貴過香港 哩度係伯利恆當地人o既市集 伯利恆o既商場, 入面就好似旺中咁, 賣一d當地人o既衫 伯利恆o既景點就只係爭隔離牆未睇, 而要去隔離牆就要去返頭先落巴士o既Hebron Road再向北走 因為市集同馬槽廣場o既士多都冇我地頭先落巴士附近o既士多咁平, 所以我地經過又買多幾枝野飲第2日飲, 咁多野夾埋都係ILS$13 哩個咁靚o既建築原來係一間酒店 隔離牆 隔離牆係以色列官方2002年沿住六日戰爭前停火線起o既圍牆, 8公尺高o既圍牆上面仲有鐵絲網, 高壓電網同電子監控系統, 而每隔一段距離仲有暸望塔, 隔離牆而家全長約700公尺, 而且仲不繼延長緊, 佢差唔多將成個西岸地區包圍, 住o係伯利恆o既巴勒斯坦人就好似住o既一個巨型監獄入面, 想進入耶路撒冷都要伸請通行證, 而邊境o既以色列軍人對於過境o既巴勒斯坦人都會盤問得特別嚴格 以色列亦因為隔離牆被全世界指責, 但雖然國際法庭要求以色列拆左隔離牆, 但到而家都係冇拆過, 所以近年亦越來越多當地人甚至黎自世界各地o既藝術家都o係隔離牆以塗鴉表達佢地o既慎怒同無奈, 亦成為左幾個傳統宗教景點以外o既新景點 隔離牆雖然長, 但當中塗鴉都集中o係Checkpoint 300附近o既Hebrone Road 除左隔離牆, 連附近o既建築都有塗鴉 點擊圖片放大 隔離牆附近o既小店都有賣一d關於釋放巴勒斯坦o既記念品或者postcard, 本來都想買張postcard, 但因為postcard都要在以色列寄出, 驚住寄唔出所以都冇買到 點擊圖片放大 +7 美斯哩個塗鴉應該係最近先畫上去 點擊圖片放大 +4 沿住隔離牆走, 就會去到Checkpoint 300, 要返返耶路撒冷都要經過哩個檢查站, 站口都有唔少以色列軍駐守 沿住哩條路行入去, 就係一個好似臨時搭建o既出入境檢查站 頭先我地就o係對面行出黎 再沿住哩條路落去就係安檢關卡, 要check passport同背包都要過xray, 一般旅客好快都可以通過(進入伯利恆唔洗檢查, 只有出黎雖要安檢) 一出黎就會見倒返耶路撒冷o既234號巴士, 巴士每20-30mins一班, 車費ILS$4.7, 車程30mins 回望頭先個檢查站, 我覺得有種放監o既感覺 返到黎耶路撒冷先3pm倒, Old City內亦比較多人 點擊圖片放大 每次由New Gate返hostel都必要經過聖墓教堂, 穿過哩個拱門就係聖墓教堂, 因為Old City內d路都比較窄, 所以d車都比較窄身 返到hostel正想問hostel職員有冇收倒機場電話話我地d行李到左未, 坐低冇幾耐職員就行黎話機場打黎, 話運送行李o既車已經到左Old City門口, 叫我地而家出去, 佢會等我地, 即刻狗衝出去, 出到去周圍望先見倒我身後白色哩架車旁邊有個人向我地招手, 原來佢正正就停o係New Gate正對面, 對左身份後終於拎返我地o既行李, 唔洗特登去機場真係超開心~ 比預期中早拎返行李, 我地就o係hostel休息一陣, 之後先直接出返Old City外面哩間Rony's Pizza食晚飯 Pizza有兩個大細, Regular ILS$59, Large ILSILS$91, 雖然話Regular得六塊, 但其實係我地11吋8塊o個隻size 除左可以全個order, 亦可以逐件(ILS$14), pizza都係即叫即整, 而單件雖然係預早整好, 但上枱前都會幫你烘返熱 我地叫左一個Regular o既Rony's Pizza, 哩度有幾款pizza, 但大部份都冇肉, 最多都係得三文魚, 哩個Rony's Pizza雖然冇肉, 但係哩度o既招牌所以我地就試哩個 Pizza邊好脆, 芝士同番茄醬夠多好夠味, 中間長方形一塊塊o個d唔知係乜食落去口感有d似辣肉腸 哩度有好多唔同o既調味料 而家係夜晚7:20pm, 溫度大約只有20度倒, 冇諗過咁凍冇帶披肩出黎, 越坐越凍(o個日係特別凍, 之後日子o既旁晚都冇咁凍) 見倒輕軌經過當然又要影返張 因為想試佢個Five Cheeses Pizza, 所以食完我地就另外叫左一塊, 不過除左餅邊夠脆之外, 都冇乜特別 Old City外輕軌線兩邊o既Jaffa Street算係哩附近最旺o既街, 好多食店, 商鋪都集中o係哩度, 見食完飯仲早, 就o係度行下 原來哩個牌子唔係淨係得礦泉水 見哩間麵包店咁多人幫趁入去望下 點擊圖片放大 +3 逛完一輪, 經New Gate入返Old City, 聖墓教堂已經就黎閂門, 但依然係咁多人, 好彩趁閂門前穿過, 唔係又要兜一大個圍先返倒hostel 影返今日買o既戰利品, 海鹽, 死海泥, 番梘, 全部買四送一, 共ILS$128, 以為好抵, 點知之後去死海, 竟然見倒o個度賣得仲平, 點估倒咁出名o既死海會賣得仲平, 不過出到機場又冇哩d平價牌子死海產品了, 得返名牌Ahava
