雖然我最喜歡去d奇怪地方, 以色列我都有興趣, 但本來冇諗住咁快去, 但今年4月突然見到以色列航空因為以色列建國70周年, 所以香港飛以色列來回連稅竟然都係HK$3,782, 但就一定要6月出發, 不過竟然連住端午節都一樣價錢, 請4日去倒9日, 當然即刻扑取 對於一般人, 包括我, 以色列只係一個成日o係新聞聽倒佢打仗或者o係聖經會見倒o既名字, 可能會令人覺得佢治安好差, 或者覺得係好悶, 只有教徒先會去, 但經過2個月o既research再親身去埋, 我可以話俾你聽, 唔係架, 以色列唔單止唔危險, 佢仲係一個宗教好多元化o既國家, 佢亦有好悠長同悲壯o既歷史, 無論有冇宗教信仰, 有機會一生人真係點都要去一次 少少歷史背景 如果唔係讀history o既朋友可能都會奇怪, 以色列又話有悠長歷史, 點解建國只有70年呢?其實以色列國早o係2000年前已經有, 當期時o既以色列人都係猶太人, 後來以色列國俾人滅國猶太人就大逃亡, 之後以色列國原本o既國土俾唔同o既民族佔領左, 而猶太人就流亡到去世界各地, 而哩班猶太人雖然分散各地, 但個心都一直想返返去以色列度復國, 最初佢地只有少數猶太人透過搶地霸地或者買地聚集o係當時已經屬於巴勒斯坦統治o既以色列故土, 後來越黎越多猶太人返返去, 周邊o既國家怕佢地越黎越強大, 就不斷攻打佢地, 而猶太人亦一心想攞返自己o既土地, 所以點解以巴一直不停打仗, 而o係70年前國際間終於讚成以色列復國, 但以巴o既衝突依然係時戰時休 入境問題 點解我要打咁大段野講佢o既歷史, 當然除左有個了解之外, 亦引申到我地最切身o既入境問題, 就因為以色列國地小人少敵人多, 所以佢入境都非常嚴格, 雖然香港去以色列係免簽証, 但同樣要經過佢o既魔鬼安檢。香港去其他地方, 一般起飛前早2hr check in已經卓卓有餘, 但飛以色列就唔同, 因為o係check in前就已經要逐個人俾以色列駐港o既保安盤問, 如果你係2個或以上o既人去, 佢地係會分開你地黎盤問, 佢地唔單止問你點解去以色列, 去幾多日, 住邊, 會去邊度, 之後會去邊度, d行李係咪你自己pack, 有冇人掂過你d行李, 有冇去過其他中東國家, 哩d咁基本o既問題, 仲會連你做乜野工作, 邊間公司, 住邊度, 同邊個去, 同伴同你係乜野關係, 你地係點識, 幾時識都問埋, 所以最快都要盤問10mins, 如果你本passport有其他回教國家o既蓋章, 特別係伊朗, 更加會被盤問2hrs+, 所以如果係哩個情況, 最好係事前換過另一本新o既passport 到盤問完拎完機票都唔好開心住, 因為除左寄倉行李職員會叫你唔好上鎖, 佢地會check之外, 臨上機前, 佢仲會拎晒你地所有o既手提行李去check, 連你手機/銀包/著緊o既鞋佢都會用個儀器去掃黎掃去check, 所以佢地都會建議旅客要o係起飛前3hrs check in 行李 行李方面強烈建議去程唔好寄倉!唔好寄倉!唔好寄倉!即使要寄倉, 都要保留頭一兩日o既必要日常用品手提跟身, 因為頭先講到, 旅客每一件寄倉同手提行李佢地都會check, 成班機幾百人, 其實起飛前佢地好多時都唔會check得完, 即使往往班機因為咁而delay左1hr都係check唔晒, 所以好多時大部份旅客o既寄倉行李都因為未check完而冇跟機去以色列, 佢地係要等到check完晒, 安全, 先會跟下一班機去以色列, 而下一班機往往係一日後, 如果你本身係住酒店都還好, 航空公司會有專人將你o既寄倉行李送去你酒店, 如果你係住耶路撒冷古城入面d hostel, 由於古城入面都係d凹凸不平o既石板路, 所以航空公司o既行李車只會停o係古城外, 佢會差唔多到先打俾你, 你要o係15mins去到古城門口拎返d行李, 逾時不候, 佢地會放低d行李自己走人, 而你係唔會知你d行李幾點倒送到黎, 你可能成日都唔敢走遠等佢電話, 如果你plan左落機第2日就即刻去約旦咁仲死, 行程就俾佢搞到亂晒 治安 前面講到以色列咁多敵人, 行李都check得咁嚴, 治安好似好差咁, 其實係完全相反, 我今年6月去o個陣正值美國總統侵侵準備去耶路撒冷領事館o個排, 新聞都講到隨時打仗好危險咁, 但我去到當地o既時候其實好平靜, 其實除左耶路撒冷比較多軍人駐守, 同人多o既地方, 好似巴士站, 火車站, 古城內回教區要安檢之外, 出左耶路撒冷, 其實都冇乜野, 同埋就因為以色列係全民皆兵, 男女都要當兵, 可以想像如果有偷野打刦哩d情況, 周圍d路人都打得, 所以治安比起好多歐州國家都要好 消費 以色列位處中東, 所以可能會有唔少人以為佢好似周邊d中東國家咁係發展中國家, 但事實上佢除左耶路撒冷刻意保留歷史建築之外, 其實以色列係一個非常先進o既國家, 有超過20% o既諾貝爾獎得主就係以色列人, 而以色列當地, 特別係首都特拉維夫o既消費亦都拍得住香港 交通 以色列o既火車巴士小巴都好發達, 絕大部份o既景點火車同巴士都已經去得倒, 而且網上亦查得倒班次車程車費等資料, 所以事前只要做多少少research, 完全唔難去 安息日 最後亦都非常重要o既一樣就係安息日, 以色列o既國教唔係基督教唔係天主教, 而係猶太教, 而猶太教o既安息日係由星期五黃昏開始至星期六黃昏完結, 所以點解以航o既班機都冇星期五出發, 唔單止咁, 國內所有火車巴士小巴安息日都唔開, 哩段時間如果要搭車, 就只有少量由阿拉伯人營運o既巴士同埋的士, 而食店好多亦都冇開門, 所以plan行程時亦要格外留意 行程 一般玩以色列都會連埋約旦或者埃及, 但前提係你要有12日或以上o既時間, 由於我得9日, 唔想咁趕, 所以今次我只係玩以色列 Day 1: 香港>以色列機場 Day 2: 機場>耶路撒冷: 聖墓教堂>苦路>哭牆>馬可樓>鍚安山聖母安眠教堂>猶太墓園>橄欖山 Day 3: 耶路撒冷>伯利恆(馬槽廣場>聖誕教堂>聖凱薩琳教堂>母奶洞穴教堂>隔離牆)>耶路撒冷 Day 4: Mahane Yehuda Market>圓頂清真寺>以色列猶太大屠殺記念館>Rami Levy Supermarket Day 5: 耶路撒冷>馬撒大>死海>耶路撒冷 Day 6: 耶路撒冷>特拉維夫>海法>阿克古城>海法 Day 7: 海法>巴哈花園>特拉維夫>Carmel Market Day 8 &9: 特拉維夫>雅法古城>機場>香港 洗費 全亞洲只有香港, 北京同曼谷有直飛以色列, 而香港飛以列色o既來回票價平均要$6,000至$8,000, 所以可以窮遊以色列, 好大程度全靠搵倒平機票, 其他門票車費食住唔算太貴, 景點好多地方都唔洗門票, 應該話好多大景點都唔洗門票, 除非有特別想去o既景點, 否則都唔會特登去d要門票o既景點, 交通方面除左安息日當日冇公共交通工具, 其他時間都可以搭火車巴士, 反而住宿最平都要$500-600/雙人房, 如果住酒店當然更貴, 所以最好夾o岩人數住雙人房, 或者住hostel床位
