Day 4: 蔚山石南寺>釜山 今日離開蔚州前會先去一個景點, 所以我地7:00am就要起身, 好彩已經有早餐食, 因旅館每朝7:00am都會有方包, 花生醬, 果jam, 咖啡供應 雪櫃仲有橙汁, 牛奶同雞蛋 不過廢事開穫, 所以只係食花生醬多士同橙汁做早餐算 check out係自助形式, 自己放低鎖匙o係哩個籃度就可以, 本來我地想出發前寄存行李, 但因為唔見旅館老闆, 我地唯有就咁放低o係樓梯底, 再o係行李上面貼張紙 因為本身由旅館行去往石南寺o既1713巴士站都要約20mins, 加上花左唔少時間搵個巴士站, 最後落巴士都已經9:15am, 車程45mins, 車費W2,080(HK$14.6) 行出停車場就會見倒石南寺o既石碑 石南寺門票W1,700(HK$11.9) 買左門票, 就可以沿住哩條路行入石南寺, 哩條路兩邊都係楓樹, 可惜全部都仲係好綠 點擊圖片放大 哩d私家車會唔會係d僧侶?! 點擊圖片放大 +7 石南寺最出名就係前面條紅楓隊道, 可惜仲未轉紅, 只有寺入面一兩棵楓樹轉左紅, 所以好快我地行完一圈出返黎, o係頭先石南寺個石碑附近等巴士出返去食lunch 搭807號巴士就黎到食lunch o既地方, 車程25mins, 車費W1,250(HK$8.8 ) 11:00黎到哩間彥陽瓦房烤牛肉, 佢本心距離蔚山市中心都幾遠, 但咁o岩就o係石南寺出返蔚山o既途中, 所以黎哩度食lunch就o岩o岩好 入食店前例排要除鞋先 叫左W19,000/人哩個瓦舍燒肉套餐, 又係成張枱都放滿前菜, 超豐富呢~ 牛肉下面係用炭慶住 唔好睇哩個牛肉碎濕濕咁, 但食落又幾好味, 醃得夠味, 又唔會太鞋 食完原來仲有甜米露做甜品 哩度又有免費咖啡機, 都幾好飲 食完搭返1703巴士(車程35mins, 車費W2,080)出返旅館攞埋行李就可以再搭708號巴士(車程12mins, W1,250)去蔚山長途巴士站 仲記得蔚山長途巴士站對面有間3層高o既Daiso嗎?趁走之前我地又去掃一轉 由蔚山搭去釜山o既長途巴士15mins就有一班, 非常方便, 車程50mins, 車費W5,000(HK$35), d位仲舒服過坐飛機, 發車亦超準時 落左長途巴士, 仲要搭大半個鐘地鐵先去到位於南浦站o既旅館, 所以check得in黎都已經16:00了 check-in o個層同時亦係用餐o既地方 洗衣機亦都o係哩層, 所以可以想像要同好多人share, 不過好彩有快速20mins洗衣工能, 所以夜晚都搵倒空檔洗下衫 旁邊d垃圾桶分類多到呢, 掉垃圾都要諗幾秒究竟要掉落邊個垃圾桶 最貼心係有埋行李磅, 臨去機場前磅下就o岩 點擊圖片放大 哩間旅館雙人房要$340/晚, 已經係成個旅程3間旅館入面最貴, 雖然房間好細, 不過勝在好新淨 廁所細到只可以企o係洗手盆前面沖涼, 不過水就夠熱夠猛 房間都有提供沐浴露洗頭水護髮素 放低行李後, 我地就去左附近o既小食街 見哩個糖餅都幾多人排隊, 我地又買黎試下 糖餅W1,200(HK$8.4), 食落甜甜地, 中間有d好似五仁咁o既野, 好有咬口, 都幾好食 之後我地就搭地鐵去到西面, 黎哩間高峰飯卷 主要係為左買個飯卷聽朝行山前食, W2,500(HK$17.5), 飯卷拎上手仲係暖架 黎西面當然唔止買個飯卷, 因為我地要黎哩間海東海鮮鍋食晚餐 原本入黎時都冇人, 坐低冇耐就見倒有一行10人香港人入左黎 六款前菜唔算特別多, 但每一款味道都唔錯 海鮮鍋超多料, 有鮑魚有蟹有八爪魚有大蜆都係W35,000(HK$245) 點擊圖片放大 +2 仲有阿豬媽幫你剪埋八爪魚同拆埋殼 個海鮮湯酸酸辣辣, 味道有少少似冬陰功 哩舊唔知係咪熟左o既白子?! 之前仲諗住搵一晚去哩d路邊撻食, 但晚晚都食到飽都冇機會 行去食甜品期間, 見倒有人o係度影相, 我又影下先 點擊圖片放大 哩間香港拉麵專門店竟然有好似一蘭o既探監位 終於到左我地食甜品o既地方 佢d顏色我硬係覺得有d似賣sex toy 右邊係Crunch Waffle Chocolate, W7,300($51), 有黑/白/牛奶朱古力揀, 我揀左黑朱古力, 所以要另加W1,000(HK$7), 哩杯朱古力味道都幾濃, 飲緊o個時會飲倒一粒粒o既威化波波, 脆脆地咁 左邊係Dinosaur Egg Ice Flake, W12,000(HK$84) 隻恐龍蛋係放上一個好似花盆o既碗度, 入面放左好多朱古力扮泥土, 我地首先要將朱古力漿淋上恐龍蛋上面 哩個Dinosaur Egg係跟一個鐵槌 之後就可以扑碎佢黎食, 恐龍蛋外殼其實都係朱古力, 而入面係有一球朱古力雪糕 泥土下面仲有雪花冰 食完甜品我地就快快去左西面地下街行下, 因為d地下街21:00就收, 我地黎到時都已經20:11, 都已經唔多人 不過入面賣d野真係好似旺中, 同埋d衫都太厚, 所以都睇唔o岩 最後去埋樂天超市先返旅館 樂天超市入面有d貨品寫住有discount, 但旁邊有個紅色label, 原來係寫住VIP先有哩個discount, 因為唔知佢寫乜, 結果俾佢呃左, 買左先知佢冇折