唔好話上水旺角多某國人, 而家就算去到外國, 都可以撞口撞面係香港人, 但好難想像香港會有一間餐廳除左我地之外, 全部都係紅鬚綠眼, 感覺就好似去左外國咁, 唔係話扁低自己人, 但的確有種渡假o既感覺, 好relax ****************** 講緊o既唔係o係山旯旮o既食店, 而係o係中環鴨巴甸街一間酒吧餐廳, 餐廳名就叫Aberdeen Street, 雖然o係半山, 都要花少少腳力先去到, 但去過就知道哩d腳力係值得花o既 餐前麵包 麵包都幾軟熟, 如果有埋牛油仲好 Cojito($60) 雖然話係酒吧餐廳, 但唔飲酒o既都可以揀mocktail。哩杯Cojito有椰青水、青檸、薄荷葉同糖漿,飲落有椰青清甜味之餘,仲有少少薄荷味,但又唔會強到好似食牙膏咁,都幾好飲。 Burger Couple($88) Burger Couple聽個名都知有兩個burgers,哩個價錢當然冇可能係大burger,雖然只係小burger,但味道絕對唔失禮。兩個burger o既餡料亦唔同,左邊係牛肉,右邊係雞肉,兩個burger用o既芝士亦唔同。 牛肉burger芝士味比較咸,牛肉又腍又juicy,雞肉就相較之下就淡味d,不過因為burger有烘過,味道都唔會太差 Lamb Rack ($185) 羊架一客有三件,旁邊都有好多配菜。 配菜有三色椒、脆肉瓜同薯仔,顏色好豐富。 薯仔外脆內軟,夠熱又惹味。 食羊架唔少得芥末醬,哩度o既芥末醬係連埋芥末籽o既,芥末味夠濃帶d咸味,用黎配羊架一流。 羊架生熟度o岩o岩好,仲有少少血水流出,羶味唔重,肥瘦亦適中,肉質好嫩滑。 總結,餐廳環境寧靜,燈光昏暗,除左o岩同男女朋友黎,個人覺得亦適合三兩知己靜靜地傾下計,侍應全部係外藉人士,餐牌亦只有英文,所以想享受一刻寧靜都要講返兩句Chinlish。 味道: 4/5 環境: 5/5 服務: 4/5 衛生: 4/5 抵食: 4/5 食店: Aberdeen Street 地址: 中環蘇豪鴨巴甸街41-49號金豪大廈地下1號舖 電話: 2546 5833 人均消費: $350