而家茶記食個lunch都閒閒地$5x, 約貧友食晚飯, 就算係樓上cafe質素普普通通都講緊人頭$100-200, 但最近就俾我發現銅鑼灣有間西餐廳, 成間用乾花黎佈置, 好有田園氣息, 野食好味又大份, 但加埋一堆單人均竟然都係$200倒, 銅鑼灣喎, 地鋪喎, 超抵食~ *************************** 講緊o既係花子舍Flora house, 雖然話係銅鑼灣, 但咁o既價錢, 當然要行遠少少, 所以佢o既實際位置其實係銅鑼灣同天后中間 夜晚佢地主要做set, $145-198, 有餐湯有沙律有主菜有野飲, 野飲仲唔係淨得普通咖啡茶, 而係餐酒或者特飲都唔洗另外加錢 哩張drink list入面除左最貴o個個smoothie同枝裝酒, 其他全部都唔洗加錢 煙肉椰菜湯 湯好夠杰, 似薯蓉o個d沙沙地口感, 完全唔係平價西餐o個d水汪汪質素 沙律 跟餐沙律竟然有兩大塊煙三文魚, 平時有半塊都偷笑了, 沙律菜都好夠醋汁, 酸酸地好開胃 黑松露薯條($55) 黑松露薯條就另外加o既, 佢地個薯條好有口感, 唔係腍晒, 又唔係得個脆字, 好好食, 黑松露醬都香 美式特厚芝士漢堡包($159) 漢堡包好大個, 薯條都多, 正常一個人叫一個餐應該食唔晒 件牛肉目測有2cm厚, 好juicy肉唔會太鞋, 加埋半融芝士, 正~ 新西蘭羊架($188) 咩架一份有三大件, 每件都有半隻掌心咁大 叫左7成熟, 唔會太韌, 都ok, 蘸埋薄荷醬仲好食 原隻軟殼蟹墨汁意大利飯($159) 軟殼蟹好脆, 炸漿夠薄, 好味, 不過意大利飯就鹹左少少 德國脆皮鹹豬手($168) 豬手好大份, 豬手皮超脆, 脆到卜卜聲, 就算放左好耐都仲係脆, 豬手肉唔會太鹹又硬, 都好食 花子冰 花子冰本來單點要$52, 但跟餐一樣唔洗加錢, 入面有粒有花同生果o既冰, 好靚, 味道就係酸酸甜甜咁 朱古力 朱古力就比較普通, 味道淡左d 總結, 整體野食唔錯, 份量又多, 基本上3個人叫2個餐已經夠飽, 同區計堅係平 食店: Florahouse 地址: 銅鑼灣信德街2-3號百威商業大廈2-3號地舖 電話: 2320 1198 人均消費: $200