如果由德己立街行上蘭桂芳, 一定會見倒角落頭有一間串燒店, 見倒佢一枝枝串燒棟晒o係度, 香噴噴, 都咪話唔吸引, 但最衰佢只可外賣, 但最近發現原來佢隔離o個間泰菜店Thainan Chicken同佢係有關係, 因為店入面都有埋隔離串燒店個餐牌, 只要是但點店內一款泰菜, 就可以拎埋串燒店d串燒坐o係店內慢慢食 Thainan Chicken地方唔算好大, 只係得幾張高枱高凳, 可能唔係好多人知道哩個秘技, 所以雖然好多人食串燒想入黎坐, 但都俾店員請走左 餐牌其中一面就係Thainan Chicken, 選擇唔算好多, 但比較受歡迎o既泰國菜式都有 而另一面就係隔離串燒店個餐牌 食串燒當然要飲野, 店內就提供左幾款野飲 Blood Orange($20) 見好少見, 就叫哩款血橙汁試下, 顏色比平時d橙汁深少少, 冇XX先生咁死甜, 都唔錯 Lime Soda($20) 大大杯要黎解辣最o岩 泰式酸辣鳳爪沙律($52) 哩個泰式鳳爪夠酸夠辣, 辣度我估計有中辣程度, 鍾意食辣o既人會越食越過癮 泰式串燒配炒飯及雜菜($68) 哩個炒飯包三串串燒, 可以o係雞牛豬三款入面揀, 我地就每樣要左一串, 串燒好入味, 肉又腍, 燒得好香口, 基本上唔蘸沙嗲醬都好好食, 至於個飯炒得都夠乾身, 味道都o岩o岩好唔會太淡味 魷魚鬚($20) 魷魚鬚醃得都好入味, 不過就嫌佢唔夠粗壯o者 泰國魚餅($25) 咬落去彈彈地, 都唔錯 豬頸肉($20) 唔會燒得太乾, 醃得都入味, 好食 菠蘿($20) 菠蘿又汁又清甜, 要解解辣解油膩最o岩 味道: 4/5 環境: 4/5 服務: 3/5 衛生: 4/5 抵食: 3/5 食店: Thainan Chicken 地址: 中環蘭桂坊和安里1號地下B舖 電話: 2613 9422 人均消費: $100內
