日期: 20/11/2016 難度: 2*(5*為最難) 補給: 無 搭入11月, 又係睇芒草o既季節, 講起芒草, 大家第一時間會諗起大東山, 雖然大東山o既芒草確係靚, 夠大片之餘仲配埋屋仔, 但芒草季節每逢周末仲旺過旺角, 其實除左大東山, 香港仲有好多地方有芒草, 今次我地就揀左大帽山, 路線相對比大東山易行, 慢行休息加影相大約4個鐘就搞掂, 除左頭段比較多石級, 之後都上落不大, 大人細路都行倒, 芒草雖然唔及大東山咁大片, 但影相就角度o既話都可以呃倒唔少like, 重點係人都冇大東山咁多 *************************** 麥里浩徑第8段->大帽山->麥里浩徑第8段 13:00荃灣西站集合, E1出口就係巴士總站, 我地搭13:20開出的51號巴士, o係郊野公園站落車, 車程約20mins, 落左車過對面馬路, 就會見倒麥里浩徑第8段個入口 開頭都係沿住哩d石級不斷上, 慢慢行大約40mins就上晒d樓級 14:20上到哩個位, 之後o既路已經上落不大, 山上好大風, 戴住o既帽都好容易吹甩 對面坐山就係大帽山 之後就係哩d平路 其實沿路都有芒草, 不過有d位比較少, 想影人就難d, 但趁有陽光都影返張芒草特寫先 上大帽山可以揀行石屎路或山路, 不過石屎路就會比較長同悶 所以一見倒可以轉返入山1路, 我地都會揀山路黎行, 哩舊石個標誌就係代表麥里浩徑 路左綠色哩間屋, 有行多約半個鐘就到大片芒草o既地方 由於發現越行越大霧, 能見度得返十幾米, 再上都冇乜意思, 所以我地沿路折返 睇下幾大霧, 仲好大風tim, 如果停得耐仲會開始有d凍 沿路落返山, 見倒哩個位好多芒草, 都有d人o係度影緊, 可惜好大霧, 但橫掂都黎到, 就黎影返張相先走 影影下竟然出太陽, lucky! 點擊圖片放大 +3 有陽光真係靚好多, 芒草都變成金黃色 繼續落山, 見倒好靚o既雲, 又忍唔住停低影下相 點擊圖片放大 一路落山, 就見倒太陽開始落山, 由於唔諗住影日落, 所以都係邊行邊影算了(如果要影日落, 就要摸黑行大半個鐘先出返巴士站) 點擊圖片放大 +3 其實就黎落到巴士站時, 仲見倒雲層都變成經色好靚, 不過因為已經落到低位, 天空都被樹枝遮住, 所以就冇影了 落到公廁位, 梳洗完食返個西米糕先 過左公廁位, 落多7mins倒就黎返巴士站, 時間係17:42, 條人龍已經有過百人, 由於巴士只有單層, 而且半個鐘先有一班車, 所以我地決定過對面馬路搭回頭車(巴士係循環線), 最後都要等左1hrs第3班巴士先上倒車, 大約45mins就出返荃灣西站
