讀書年代好鍾意去樓上cafe, 貪佢坐得耐, 又有board game玩, 但因為野食質素真係越黎越參差, 都寧願俾多少少錢去餐廳食好過, 不過最近就有朋友介紹左間旺角樓上cafe, 話野食好味, 賣相又靚, 最o岩我地哩d相機食先o既人, 就同朋友黎試下 *************************** 講緊o既係Infinity Workshop, 個名有workshop哩個字, 原來係因為Cafe耐唔耐有同唔同o既手作導師合作, o係cafe入面搞唔同o既手作班, 好似手機殼班, 皮革班,....等等, 所以cafe入面o既枱都唔會擺得太密, 方便手作班同學走動 Menu入面除左有幾款咖啡之外, 仲有一個用迪士尼角色命名o既飲品, 其實全部都係唔同o既果汁, 賣相都幾吸引 貝兒($49) 哩杯貝兒, 其實係蜜桃汁, 係由新鮮蜜桃打出黎, 朋友話都飲倒d桃肉, 亦因為係鮮渣, 所以野飲都要等一段時間先出倒 艾利奧($49) 我哩杯叫艾利奧, 成杯tiffany blue超靚, 其實係青蘋果汁, 入口會飲倒少少蘋果渣, 明顯都係鮮渣, 而且冰唔多, 所以飲到最後都唔會變淡 蜜糖雞翼($68) 蜜糖雞翼一客有6隻, 每隻對半切開, 煎得夠乾身, 但肉質都唔會過乾, 本身都已經鹹鹹地, 其實唔蘸蜜糖都好食 黑松露油炒鮮帶子虎蝦意粉($108) 隻虎蝦有成隻手掌咁大, 食落都幾彈牙, 仲有3粒帶子, 每粒都大過$5銀, 有d彈口咁, 意粉好香黑松露味, 而且煮得唔會太腍, 彈彈地, 好好食 特色漢堡三重奏($118) 漢堡上枱時, 最驚喜應該係排到井字形o既薯條, 因為一般就算出去食哩類過百蚊o既漢堡, d薯條都唔會排得咁靚, 店員話因為佢地知道好多食客都鍾意相機食先, 所以都會盡最整靚d先上枱, 成件事覺感好有心思 講返個漢堡, 可以揀牛肉, 依比利亞豬或者免治和牛, 我地就揀左免治和牛。件免治和牛都好厚身，目測都有一吋厚，食落都有肉汁又醃得夠味，另外塊菜都比平時d漢堡大塊過人, 塊芝士融融地好香芝士味, 正~ Haagen-Daz雪糕心太軟($98) 個心太軟又係present得好靚, 用糖漿劃晒花, 粒士多啤梨仲要雕晒花咁, 明顯係人手整唔會罐頭貨, 雪糕可以揀士多啤梨, 雲呢拿或者朱古力, 我地揀左士多啤梨, 但食落好沙冰feel, 唔知係雪得太凍定佢加工過? 至於個心太軟就超軟綿, 輕輕一刀已經切開左, 朱古力醬就比較杰身唔係太流, 但都好濃朱古力味, 蛋糕好軟唔乾身, 好食 總結, 如果用普通樓上cafe比, Infinity Workshop價錢就貴左少少, 因為根本唔可以當佢係樓上cafe, 佢野食o既質素直頭拍得住或者好過部份西餐廳tim, 而且座位可以話寬敞過好多餐廳, 但最難得係好多細節位睇得出有花心思, 唔係hea做 味道: 4/5 環境: 4/5 服務: 5/5 衛生: 3/5 抵食: 4/5 食店: Infinity Workshop 地址: 旺角登打士街43H號登打士廣場5樓全層 電話: 3956 9117 人均消費: $250
