雖然抵食o既任食韓燒有左好多年, 但質素始終一般, 次次食完都一大陣味出返黎, 隻隻肉又差唔多味, 所以近年流行o既單點韓國烤肉雖然貴d, 但因為好食好多, 連平時唔鍾意食韓燒o既朋友都會食~不過每次食一食, 冇返三幾百唔洗諗住走, 但最近就有朋友介紹有間韓國烤肉店$268/二人已經有肉有海鮮, 味道亦唔差, 當然要去試一試啦 ********************************************* 講緊o既係OPPA韓國燒肉店, 佢有兩間分店, 一間o係旺角, 一間o既大埔, 而我係去比較就腳o既旺角分店 店入面就似而家新興o既韓國烤肉店咁, 都係圓枱配圓凳, 凳入面都可以擺野, 每張枱上面都有個抽風機, 所以油煙唔算好勁 雖然係平日, 但可能有promotion, 都差唔多坐滿, 座位就比一般o既韓國烤肉店迫少少, 不過都可接受 頭先講緊o既抵食二人餐就係哩個, 只有星期一至四17:30-19:00先有得食, 19:00後就要收返正價 未點菜先黎三色前菜, 有泡菜, 芽菜同海帶, 全部可以免費refill, 個人覺得泡菜最好食, 另外兩樣就比較淡口 除左前菜, 哩d生菜都係免費refill, 主要係用黎包住d肉食, 唔洗咁滯 調味料都係免費refill, 有醬油, 甜辣醬, 麻油同辣椒蒜片 每枱中間都有哩個鐵板要黎燒野, 哩個鐵板都幾正, 佢本身係擺倒斜斜地, 等d油可以經底d o個面, o係個咀度留出黎, 同埋本身分左幾格, d燒好未食o既野可以放o係旁邊熱住唔怕凍, 最好係佢完全唔痴底, 每次燒完, 侍應姐姐都會用個鐵鏟輕輕鏟起d焦, 再用塊生菜抹乾淨, 之後再拎舊豬膏搽d油上去, 又可以再燒過 而家食韓燒, 通常都會有蛋卷, 哩度o既蛋卷係落左泡菜入去, 生熟程度就自己控制, 不過蛋卷就冇得免費refill了 我地燒到蛋卷表面o岩o岩熟就食, 所以入面仲好多蛋汁好嫩滑 二人餐包左一豬一牛一海鮮, 豬我地就揀左五花腩, 一份有三塊, 每塊都有1cm厚, 都算厚切 點擊圖片放大 +2 因為怕佢唔熟, 侍應姐姐都會幫我地切得細細條咁燒, 五花腩肥瘦o岩o岩好, 燒過之後比較香口, 同本身已經醃過鹹鹹地, 味道都唔錯 燒完之後o既肥油就係由哩個口漏落下面隻碟度 牛我地就揀左頂級安格斯肉眼扒, 都幾大塊, 有成隻手掌(連手指)咁大, 約1吋厚 點擊圖片放大 肉眼扒好腍唔韌, 食落唔會好鞋口, 醃得都夠味, 幾好食 最後就係海鮮拼盤, 有兩大粒帶子、八爪魚同4條多春魚 多春魚比較易燒燶, 所以我地擺o係d邊位度, 燒完好香口, 好味~ 大帶子仲大過$5, 目測都有2cm厚, 所以都燒左成10mins 帶子我地燒到中間僅僅熟, 仲係半透明, 食落有d彈牙, 好食 魷魚本身彈牙, 求其加d鹽燒已經好好味 埋單仲每人有一塊香口膠 總結, 雖然野食睇落唔算好多, 不過肉多, 所以食完其實都有7成半飽, 埋單加一後每人$150真係抵到爛。 味道: 4/5 環境: 4/5 服務: 4/5 衛生: 4/5 抵食: 4/5 食店: OPPA韓國燒肉店 地址: 旺角洗衣街117號建煌華廈地下 電話: 2381 2193 人均消費: $200