而家出街食飯越黎越貴, 基本上只有大排檔或者茶餐廳, 晚飯先可以$100內, 普通一間餐廳, d野唔算特別好食, 都講緊百幾二百蚊, 好食少少坐得舒服少少都講緊$300以上, 最近就發現旺角有間放題, 任食2個鐘都係$200有找, 唔同時段收費唔同, 最平去到$149, 當然食物質素就唔可以有太多要求, 不過都係可以接受o既程度, 最o岩同朋友一大班人飯聚 ************************************************************************************ 間店就o係兆萬3樓, 非常易搵 個場都幾大, 基本上都唔需要book位, 同朋友食飯, 成日last min先confirm倒, 講真, 好食同唔特別好食o既食店都book唔倒啦, 哩度就唔洗驚冇位 叫得中日放題, 所以點菜紙上面除左一般壽司, 刺身, 炸物, 前菜, 仲多左d中式料理同小食 點擊圖片放大 +2 甜品紙就係臨埋單, 侍應先俾你o既 野飲就自己出去雪櫃拎, 有汽冇汽各有4款揀, 都算係咁 刺身都算多選擇, 以平價放題黎講, 都唔算切得太碎, 雪味唔重, 不過份量就比較亂, 有d明明寫左4件, 但真正份量就肯定唔止4件, 所以最好都係唔好寫得太多先 點擊圖片放大 +2 壽司都幾多款, 特別有一個黑松露系列, d黑松露都幾香 最鍾意食芥辣八瓜魚, 有wasabi味又唔會太功鼻 日式前菜就正正常常, 冇乜特別 天婦羅炸粉唔算太厚, 不過就硬左少少, 同埋個醬油碟個口比較細, 難d將成舊天婦羅浸晒入去, 如果大返少少就好d 七味雞翼就燒得唔錯, 夠乾身, 入面d肉又唔會太乾同太鞋 羊扒唔係好羶, 不過就好似膏多肉少咁 多春魚雖然有d甩皮甩骨, 不過味道都ok 仲有泰式鳳爪, 酸酸地, 不過冇佇辣味, 唔食辣都食倒 燒雞軟骨, 脆卜卜, 唔錯 京蔥一口牛都幾腍幾入味 豉椒炒蜆雖然細左d, 不過其實粒肉唔細得過平時大排檔o個d, 而且冇沙, 放題黎講都算ok 辣酒煮螺, 哩個冇食, 唔清楚 燒菠蘿, 正, 都幾厚切, 又甜又冇渣, 不過又係黎左double, 好彩係菠蘿多多都食倒, 如果係肉就大濟 麥提沙糯米糍見未食過就試下, 仲以為入面會有麥提沙, 原來冇的, 入面係粒硬硬地o既野, 普通 味道: 3/5 環境: 3/5 服務: 3/5 衛生: 3/5 抵食: 4/5 食店: 櫻花中日放題 地址: 旺角西洋菜街1號兆萬中心3樓301號舖 電話: 3549 8949 人均消費: $200內
