今次旅程係我第1次上網搵人去 其實早於前一年, 我已經睇倒人地坪田銀杏o既相而想去 但可惜我睇倒時剛過了睇銀杏o既時間, 所以唯有留待下一年去 當我諗住去, 開始做資料搜集時 發現旅遊書都冇介紹坪田哩個地方 而且網上所有關於坪田o既資料, 都係我最初睇倒o個個abum o既主人寫的 (包括其他forum, 其實都係佢寫的)(當其時仲未有咁多hk人post話去過) 所以我唯有去返佢個album問, 睇下佢會唔會覆我 好彩佢仲有用個album, 仲教我點去 而睇返當其時去韶關路線 無論係深圳搭火車直入, 定去廣州南搭高鐵去 都係要4hrs, 所以就決定搭單去埋附近o既丹霞山 可能因為我一早plan好晒詳細行程, 好快就成團 行程: D1: 香港->深圳->韶關 D2: 韶關->丹霞山 (陽元石) D3: 丹霞山(長老峰, 翔龍湖) D4: 丹霞山->南雄->珠璣古巷->南雄 D5: 南雄->帽子峰林場->坪田(垇背) D6: 坪田(汪湯, 坪湖, 軍營寨, 龍頭)->南雄->深圳->香港 6日行程用左約hk$1,500 ********************************************* D1: 香港->深圳->韶關 因為o個時仲未開大陸銀行戶口, 冇得網上買車票, 好彩其中一個團友當日唔洗返工, 佢朝早(當日係星期5)上左深圳行下, 幫我地買車票先買倒(得返硬座) 一放工, 返屋企拎埋行李就即刻仆去深圳火車站喇(因為衡量過香港搭車去廣州南再轉高鐵同香港搭火車去深圳再轉火車去韶關都係要4hrs, 直去韶關仲平好多, 又唔洗轉黎轉去, 所以唔好煩都係用哩個方法) 約左19:30上水集合, 又話星期5多人過關, 點知唔洗排隊好快就黎到 野都未食, 一早買定麵包, 上車再慢慢食 第1次坐硬座, 感覺好新鮮, d位就咁睇都唔覺硬, 坐1hr已經pat pat痛, 仲要面對面, 你眼望我眼咁 火車上售賣玩具o既人, 估唔到咁多人對佢o既玩具咁有興趣 半夜1點到達韶關, 好彩一早book左酒店, 打的5mins就到 (RMB$23, 應該可以平d, 但佢又俾我地5個一架車, 又咁夜, 都唔再糾纏了)o係ctrip訂, 但去到又話冇record, 好彩都有房俾我地 RMB$150/雙人間(包早餐)算係咁, 床鋪乾淨, 最唔得係個磨沙玻璃廁所 我地5個人係4女1男, 問佢有冇得加床(男士初時打算如冇得加床, 佢會搵第間平d住), 佢話冇, 但又冇要我地開3個房, 最後男士打地鋪訓, 但櫃枱姐姐都好好人地free左我地第5個人o既早餐 浴簾都冇, 好彩仲有個坐廁
