日期: 2015-9-24 至2015-9-25 (星期四, 五) 雖然上年已經黎過南丫島租渡假屋住, 但因為上次黎到落大雨, 影相唔靚, 加上又成日屈左o係間屋度, 冇乜出到去, 同埋諗住租長洲渡假屋, 但睇過一般都比南丫島貴, 可能因為長洲地方大, 娛樂較多, 比較多人去吧, 而哩d比較貴o既渡假屋話係酒店裝潢, 實質係80年代電影o個d舊式酒店裝潢, 雖然有價位同南丫島差唔多, 但o個d就更舊, 而且長洲o既渡假屋全部都冇廚房的, 所以最後都係揀返南丫島算~ 南丫島地方細, 渡假屋選擇唔算好多, 不過都有廿幾間選擇, 有廚房, 冇廚戶, 有海景, 冇海景, 2人, 多人o既渡假屋都有, 梗有一款o岩你, 雖然我地係平日去, 但怕冇房, 所以就早一個月網上book左一間雙人渡假屋, 有廚房, 冇海景, 平日都係$400/晚(平日包括星期五晚), 如果星期6唔洗返工o既朋友, 星期5請一日假去渡假都抵, 因為周末要$800/晚的 因為渡假屋15:00先可以check-in, 所以一早睇定船期, 坐14:30的船, 15:00o岩o岩去到南丫島, 平日船飛仲平d tim~ 今次黎得o岩o岩好, 雖然真係曬到爆炸, 又好熱, 不過個天真係好藍好靚~ 點擊圖片放大 落左船行2mins, 過左公廁, 左手面就係今次book的渡假屋agency 之前電話打去book左之後, 佢會叫你入完數keep入數紙, 同打俾佢confirm, 黎到之後show俾佢睇入數紙, 擺低$200按金(因為冇散紙先擺低$500按金), 就會俾你一抽鎖匙, 同一張收據, 憑收據check-out就可拎於按金, 收據上面仲有地圖教你點行去渡假屋tim 其實都係一條直路行去, 行左5mins就到 上次都係住哩間房, 因為睇過哩間房係以同價位, 有廚房計係最大(報稱250呎), 所以揀返哩間 廚房只有洗潔精提供, 所有油, 鹽...都要自己帶 仲有微波爐, 飯煲, 中式鑊, 不過就冇焗爐同平底鑊 每樣餐具都係得2份 廁所有晒洗頭水同沐浴露, 但原來係冇牙膏的 仲有個小露台, 上次天氣冇咁熱, 第2朝仲可以o係度食早餐tim 因為南丫島係冇連鎖超市, 只有自家小型超市, 雖然都有食材賣, 但價錢就一定比出面貴, 所以我地都係選擇自己帶食材黎 雪糕其實都係自己帶, 放左入冰袋入面, 再加舊冰種, 係可以順利帶倒黎, 但問題係原來哩度o既雪櫃唔夠凍, 係冇可能雪返硬, 只可以減慢佢融o既速度, 所以想食雪糕o既朋友, 唯有o係出面o既小型超市買 放低行李, 煲完熱水消毒餐具後, 就行黎洪聖耶灣, o係渡假屋行黎大約15mins, 黎到差唔多17:00, 都仲係幾曬 沙灘唔覺眼有士多可以租locker, 不過人唔多, 放o係路中心容易睇倒都ok 仲諗住游水, 一落水就比垃圾包圍, 游到邊都俾垃圾追住, 最後游左10mins就忍唔住上水-,- 返到渡假屋, 沖埋涼就係時候準備晚餐 自製bbq牛油粟米XDDD 759七折時買的西冷牛排, 折左才$100, 仲有2塊, 真係大件夾抵食 d血水多到呢 同樣係759買的罐頭冬陰功湯, 仲以為入面得湯, 冇料tim, 估唔到都有唔少料, 有秀珍菇, 香茅, 同一d不知名o既香料, 冇記錯7折後係$11.x, 唔加水o既話o岩o岩夠整2碗 牛扒終於煎好了, 因為都幾厚, 每邊煎左4mins 759買的人參味農酒, 其實冇人參味, 不過唔鍾意o個種酒味, 飲左2啖就冇飲了, 反正7折後都係$16.x 好豐富呢~ 牛扒每邊煎4mins, 入面其實冇乜紅, 如果鐘意食生d, 每邊煎3mins都應該夠 食完飯洗完碗, 休息左陣, 差唔多21:00就食雪糕 由於雪櫃唔夠凍, 雪糕都林晒-,- 食完雪糕都好飽, 再休息多陣, 22:20就整帶來的杯麵食 終於有機會試下傳說中o既三養香辣雞肉味碗麵了~ 焗左4mins, 麵質依然好彈牙, 一d都唔林, 好味, 落左一半辣醬, 開頭食落辣味雖然都強, 但仲接受倒, 但之後開始黎料, 條脷感覺倒強烈辣味, 咀唇都發熱同紅晒, 不過食落幾過癮, 幾好食 第2朝的早餐 因為搞唔掂個pancake, 加上趕住check-out, 最後只整左炒蛋同咖啡 因為回程我地係o係索罟灣碼頭走, 索罟灣比榕樹灣o既船疏好多, 2hrs先有一班船, 所以最好睇定先 12:00準時check-out, 之後就向索罟灣進發 因為上次黎陰天落雨, 一早check左索罟灣14:35先有船, 見大把時間, 就上埋黎風車 雖然只係短短20mins上斜路, 但熱到爆炸之下, 都行到索晒氣, 上到涼亭好好風, 都忍唔住要大抖返一陣 休息完就落返去 行到差唔多到洪聖耶灣就會見倒哩間士多, 因為食過阿婆豆腐花所以冇食, 哩間未食過, 見都有唔少食客, 就黎抖下食下 豆腐花本身已落左蜜糖, 如果嫌唔夠甜仲可以再加黃糖, 豆腐花凍凍地, 大熱天時食o岩晒 一路行都要不時上斜, 加上冇乜樹蔭, 難度都要加返一星 行到13:45終於見倒索罟灣碼頭 睇落雖然唔遠, 但因為中間隔左個沙灘, 唔想行落沙灘, 又要兜一大個圈, 由頭先個位行黎都要30mins 見未有船, 仲o係隔離o既公廁洗下面先~ 上到船, 冷氣雖然唔算好強, 但都已經好好, 14:35準時開船, 開埋帶左未食o既媽味麵先 哩個係辣味 本身d麵已經有少少紅色辣份 但仲可以落埋提供的辣份, 食落辣辣地, 好惹味
