真金白銀俾錢買保險，冇理由唔知頭唔知路就買! 睇清楚醫療保險7大陰濕位! 1. 病歷要申報清晰, 包括父母兄弟姊妹 入賭場前都要Check 身份證, 買醫療保險當然要如實申報自己的病歷。 先天疾病、出世至今嘅病歷、係任何診所做過嘅大小手術、又或者正在服用的藥品，全部都要申報。亦唔好忘記申報近親（父母及兄弟姊妹）嘅病歷，一般來說只要唔多過一位近親有嚴重疾病都不會影響投保。 申報時要提供埋報告，可以令核保部門批核更快；申報夠清晰，到要Claim錢時亦會順暢得多。 2. 若已有團體醫療保險，可選有墊底費版本醫療保險 大部份私人機構都會幫自己員工投保團體醫療保險。不過團體醫療保險同自己係出面買嘅醫療保險所保障嘅項目會有不同，保障亦未必足夠，再加上現代人都唔會打死一份工，所以點都會幫自己買番份醫療保險。 若想慳錢又想有足夠醫療保障，可揀一啲有墊底費版本的醫療保險。墊底費正名係自負額，意思即係Claim錢時，自己要先俾左一個金額，剩餘部份先搵保險公司去Claim。正好適合有團體醫療保險的人，先claim團體醫療保險去支付墊底費，再用自己買的醫療保險Claim剩餘嘅部份。好處係有墊底費版本的醫療保險普遍保費較平，又可以避免因為小額嘅Claim而失去無索償折扣嘅優惠。 3. 住院雜費賠償足唔足夠 做一次手術往往涉及好多開支，除左一般的住房及手術費用，仲有好多垃雜收費。保險公司通常將呢啲收費歸納為住院雜項來賠償，而往往Claim得足唔足就取決於雜項賠償保額是否足夠。 以下係雜項賠償所包括嘅項目: • 被保人在住院期間內所需的藥品及藥物; • 敷料、普通外科用夾板及石膏繃帶,但不包括特別支架、人造義肢、裝置及儀器; • 化驗室檢驗; • 心電圖; • 物理治療; • 基礎代謝測試; • X-光檢查; • 測試及檢驗的醫療報告收費; • 輸血及輸血漿,但不包括血液或血漿的費用; • 當地往返被保人住院處的救護車服務; 4. 有冇包入院前、出院後的費用 做手術無論大小，事前都需要見專科醫生，而見專科醫生大部分情況都要由普通科醫生(家庭醫生)轉介。所以要注意所選擇嘅保險包唔包入院前嘅諮詢。 除了入院前嘅步驟，手術後的覆診費用亦不容忽視，例如一些報告係要等手術後覆診時由專科醫生解說，所以都會涉及費用，而香港專科醫生一般都收費$1000起跳， 所以揀醫療保險時要注意。 5. 保障包唔包括海外地區 一般來說，醫療保險都是環球保障的，萬一在海外遇到嚴重意外，會有24小時緊急意外醫療服務。但現在一些大額醫療保險會註明受保區域(例如只包亞洲區域)，或註明要係當地嘅網絡醫療機構先至受保。不論係前往外地就醫，定係不幸係境外需要入院，都受呢方面嘅細節影響，所以投保前一定要向你嘅保險經紀查清楚。 6. 牙醫、物理治療、中醫費用 一般團體醫療保險都會包牙醫洗費，員工可用報銷洗牙或補牙等普通服務的開支；但市面上自己俾錢買嘅個人醫療保險就通常都唔包，而係包緊急牙科醫療，例如仆親整甩隻牙要做手術先包，普通如牙周病或蛀牙就唔包，因兩種都屬於自然衰退。 至於物理治療及中醫門診費用，此類屬於出院後的費用現時醫療保險都會包，但注意是要手術後及需要醫生轉介才會受保，而且中醫的費用有貴有平，一般都包唔足同埋都唔會包名貴藥材的費用，若鍾意睇開中醫，係投保前就要注意。 7.保費每年升, 不能供斷 投保醫療保險就好比租樓，買一年保一年，沒有年期限制。選擇退保時不會有現金價值拎番，換句話說即係不能供斷，若真的長命百歲就要俾到一百歲。 保費是按著年齡上升，而且每年保險公司都有機會調整保費表，主要係參考番香港私家醫院收費，從而將保額及保費都調整，當然都係有升冇跌。所以保費表就只能用作參考，不是保證的。
