一、垃圾分類係生活嘅一部分 無論係西國邊個地區生活既人一般都好有環保意識，屋企裡面通常都會有三個垃圾桶：有機垃圾（例如廚餘和廚房紙）、塑膠、紙。另外，佢地會係廁所擺個垃圾桶仔裝女性用品之類。而市政府亦好配合，通常每座樓既門口行兩步就會有回收垃圾桶，除左岩岩提及既三個種類，仲有一個收玻璃同其他無法分類既垃圾。 市政府定期會收集大型廢物，所以每隔一段時間都會見到街邊放滿棄置嘅梳化、凳，甚至我有見過健身單車。自己非常欣賞呢種態度，所以番嚟香港之後，自己亦都遵從番呢個將垃圾分類嘅習慣，不過實行上嘅細節當然要改改，畢竟以香港家居嘅大細係無可能放到三個分類垃圾桶。 二、狗狗蹤影無處不在 西班牙街頭周不時都會見到人拖住隻狗，甚至係地鐵裡面都唔難發現狗嘅蹤影，而且多數都係中型狗。西國人愛狗如家人，經常都會帶住狗狗一齊上山下海，帶埋隻狗一齊跑步或者踩單車，我認識嘅一對老夫婦甚至為左帶埋一對狗狗旅行，用開車代替飛機出行。曾經有一個朋友開玩笑話發覺西國嘅狗好少同路過嘅狗打交，唔通西國嘅人nice，所以連狗都nice d? 三、入屋唔洗除鞋 一般黎講，西班牙人番到屋企好多時都會照著住對鞋周圍走，或者有時會換番對舒服d嘅鞋係屋企走動，但好多時都通常到真係臨訓或者起身果下先會見到佢地著拖鞋。至於客人拜訪西國人屋企，可以照著住對鞋，唔需要除鞋或者換鞋。呢個習慣對小薯黎講都幾唔適應，畢竟由細到大都被教導對鞋污糟，唔應該通屋踩。而呢個習慣係應該係通用於拉丁系國家，當小薯去意大利同葡萄牙旅行嘅時候拜訪過當地人屋企，佢地嘅習慣同西國人都係一樣。唯獨是去到法國人嘅屋企，就真係要係門口除鞋換拖鞋先可以入屋。 四、西國人係有禮貌嘅人 無論你識講西文又好，唔識講西文都好，反正見到人，例如鄰居、店員、公園散步迎面以來嘅人，記得要講句Hola打招呼。西國人雖然係直腸直肚，脾氣來得急又去得快，但其實講野非常注重禮貌同尊重，通常都唔該前唔該後。好記得我嘅西國老師經常係講我份功課嘅評語之前，都會問下我想聽好聽嘅說話定係真實嘅說話。由其是當同西國人涉及到各自文化嘅討論，大家都會加番句唔好意思，無意冒犯。 五、家居隔熱設計 由於西班牙嘅太陽好猛烈，由其是巴塞隆那一年之中有三分二嘅時間都係陽光普照，連雲都唔多一朵，當太陽直曬入屋嘅時候，成間屋都會變得熱辣辣，所以西班牙嘅窗戶全部都係係有一道玻璃趟窗，外面附有一道可以拉落黎嘅鐵閘。當夏天熱到30幾度嘅時候，拉埋窗台果個鐵閘，外面嘅熱力就會被阻隔，成間屋會即時降溫，西國由北到南嘅窗台都係用玻璃窗配拉閘嘅設計。 更多靚相Follow ig: the.steel.legs https://www.instagram.com/the.steel.legs/ 延伸閱讀：[西國西事］在巴塞隆拿生活觀察到的小事（下） 點擊圖片放大 +3
