上星期帶左豆少去完大阪回港,5日4夜行程其中一日帶豆兒去左滋賀縣琵琶湖Valley滑雪場玩玩雪~ 今次豆少第一次睇到落雪,第一次去咁凍的地方~所以出發前豆媽都擔心左一輪,究竟去到夠唔夠暖?會唔會容易病倒? 其實,只要著上正確嘅配搭,一樣可以輕鬆遊雪國~今次就分享小小心得比大家~ 洋蔥式穿法(Layered Clothing)~顧名思義係指有多層衣物穿法,主要分內、中、外三層~由於日本室內有暖氣,室內外溫差大,呢個穿法方便一層層將衣服脫下~ 室內可脫去外層衣服~ <衣服~上身> 1. 底層/排汗層:底層為內衣,質料以輕、簿及較貼身為主題曲~除左保暖外,亦具有透氣快乾功能~今次豆少就著左Uniqlo嘅Heatech,再加一件純綿毛衣,玩雪當日再著多左一件短䄂Heatech~ 2. 中層/保暖層:中層作用係保暖同阻隔體温流失~衣物嘅物料通常係抓毛絨(fleece)這一層並不擋風,其主要作用係保暖~豆少嘅中層我就著一件fleece衞衣,再加一件夾綿背心~玩雪當日就著左一件厚身抓毛外套代替背心~ 3. 外層/防風層:由於底層及中層只作保暖但不防風,所以外層必須要有一件外套作防風防雨之用~豆少身上呢件滑雪外套係上年響冰島時購買,防風防水度高,即使玩雪當日長時間響室外都無問題~ <衣服~下身> 下身方面,底層就Uniqlo Heatech打底褲加厚身牛仔褲\抓毛褲,玩雪當日就著左Old Navy買嘅雪褲,都非常保暖~ 雪䄛雪褲是必要的~ 中層衣著為fleece衞衣及夾綿背心~ 內層衣著為heatech內衣加純綿毛衣再加短袖heatech~ <鞋襪> 響低溫地區,最近接觸到雪地係腳部,所以腳嘅保暖好重要~小童厚襪我搵左好耐,終於響旺角雅蘭地庫一間迪卡龍運動舖買到~ 另外雪boot,我就到達大阪先買,因為選擇較多,價錢亦較平,圖中毛毛雪boot又保暖又防水,玩雪當日長時間響雪地上亦無問題~ <配件> 配件嘅用途其實可以確保保持全身溫暖,唔會有縫隙讓寒風侵襲,所以其實跟衣服同樣重要~ 冷帽:最好是以不透風的質料為主~豆少戴嘅係厚身冷帽(購自冰島) 圍巾 : 我認為頸巾是個必要裝備,因為只要頸部及頭部保暖足夠,整個身子也不容易發冷~豆少戴嘅係個頭笠,不客易脫下~ 手套 :建議戴防風防水手套,我認為毛質手套除左唔擋風,碰到雪亦容易濕掉且不易乾~豆少戴嘅手套(購自淘寶)食指到小指為一區,毋須續一手指放進手套內,對小朋友黎講較易穿脫~ 太陽眼鏡:響雪地上,若遇到太陽反射會十分刺眼~不過當日天氣唔好,所以太陽眼鏡用唔著~其實滑雪場內店舖可以買到滑雪鏡(1500yen到5000yen不等) 《總結》以上衣著配搭為豆少親身試驗~當日琵琶湖雪場上玩左大半日都保持溫暖體溫~雖然,帶小朋友去雪國旅行確實較麻煩,但見到豆少第一次見雪個種開心程度,我認為好值得!!!