豆仔而家過左兩歲，大個左，而且已經有幾次坐飛機經驗，所以而家帶佢去旅行坐飛機，已經比較輕鬆，無以前咁擔心！ 回想起頭一兩次帶豆飛，擔心佢響機上扭計，影響其他人，所以凖備定一堆娛樂呀，零食呀以便不時之需，但感恩豆仔每次都無扭計，會瞓覺～而且無耳仔痛等問題～有時唸，可能響佢地嘅角度坐飛機同坐車係無分別，一樣係要瞓覺 以下有些經驗分享比準備帶BB旅行嘅你哋～（短程機） <機票> 0-2歳為嬰兒票，無坐位～ 其實我唔知道嬰兒票問題係唔係同航空公司有關～不過我坐過嘅航班，HK express ，港龍，UA，收費各有所不同，網上話嬰兒票價為成人價嘅10%，其實⋯我並唔知機票正價係幾多（因爲我未買過正價機票^^） 兩歲前嘅豆哥試過坐嘅HK express去福岡，高松同成田，不佔坐位只係收左機票稅等雜費，大概600蚊～ 去關島坐UA~成日我地大人買特價機票around 2500, 豆仔個張都成2千 去OKA坐港龍～大人特價買1200蚊，豆仔就大約1千蚊～ 直到過左兩歲嘅豆仔，機票同成人可能只相差一百幾十~當然有自己個私家位啦~ <航班時間> 個人認為最好嘅航班時間係下午11點幾12點，因為通常豆仔7-8點起身～比佢食早餐，上機前響機場禁區內嘅兒童設施區放下電，一上機就可以瞓～ 試過因為UA去關島只有凌晨機，迫住坐啦～個程機堅辛苦，豆又眼訓，但因為太嘈好容易醒，好彩無點扭計影響其他人，但都好不容易過左5小時機，所以之後再選擇凌晨求可免則免啦～ <上機清單> 換尿用品： 換片墊，尿片3-4塊，濕紙巾 飲食用品：奶樽兩個，奶粉奶格(兩餐奶），水杯，暖壺，小匙，剪刀，零食 其他：玩具，外套，被，奶咀 <安檢> 好多媽媽都有疑問，究竟可以帶水上機嗎？其實無論香港，日本抑或關島，安檢人員見你帶住BB，都會比你帶水入閘，我通常會帶350ml暖壺入滿熱水，另外加一個水樽入滿水for開奶用，呢個份量基本上無試過被reject，但各地有唔同分別嘅係，日本嘅安檢人員會要求打開暖壺嗅一嗅，亦試過要求我飲一啖比佢睇~ <BB車> 不過我坐過嘅航班，HK express ，港龍，UA，都係可以比你選擇可以響check in 柜臺寄或者直接去到閘口比職員寄倉~ <安全帶> 兩歲前嘅BB，嬰兒票，無坐位，BB需要坐響媽媽大腿上，起飛降落時需要用一條特定安排帶扣好並駁響媽媽嘅安全排上～ <坐位> 兩歲小朋友，要自己坐啦～ 響降落同起飛時，原來三歲以上小朋友必須自行坐響坐位上，因為我試過見到前面一個同豆差不多大嘅妹妹仔響降落前被媽媽抱住，響媽媽身上熟睡中，當時空姐要求佢放低小朋友，但媽媽唔想嘈醒妹妹～空姐即時要求該媽媽出示妹妹証件，証明妹妹三歲以下才批准佢咁做～ <起飛/降落> 好多媽媽都擔心耳仔痛呢個問題～所以我通常會響飛機準備起飛同降落時，開奶比豆飲或者比奶咀,小食分散佢注意力，其實吞嚥呢個動作可以平衡耳仔嘅內外壓力~好好彩嘅係，豆仔都未試過因為氣壓問題而扭計~ 其實，要避免佢扭計都有好多方法，上機前準備定多啲佢鐘就意玩嘅玩具，盡量陪佢玩，有媽媽安撫其實佢地好開心亦唔會胡亂扭計~另外，亦可安排上機前響機場嘅兒童設施區比佢地盡情放電，一上機，佢地就好容易瞓著嫁啦~ 點擊圖片放大 最近旅行響日本搵到呢本Tomica貼紙薄，豆好鐘意，回程響機上好專心玩左成個鐘～(其他時間瞓覺)
