《東京》一個去幾多次都唔厭嘅地方～無論東京都市內抑或東京近郊～都能帶比你無限歡樂～ 今次豆哥第一次去東京～我地只會停留東京都兩整日，響網上找尋適合小朋友玩嘅地方唔少！最終決定去台場，池袋同大宮博物館～另外加埋橫濱，因為未去過~ Day1, 11:20，UO870準時出發，香港飛成田機場，其實豆爸豆媽都係第一次去飛成田，以往都係飛羽田，兩者比較，都係鐘意羽田多，出市區車程短而且平～ 豆仔今次有自己嘅座位，安全帶都玩一餐，以往起飛時佢好似無咩感覺，但今次佢明顯好開心，望住個窗，指住啲雲，對窗外環境好有興趣～ 起飛無耐，豆仔自動自覺僕響媽媽大脾瞓覺~瞓左差不多兩個鐘～ 豆起身唱下歌仔，玩下食下，好快4個幾鐘頭機就過左～成田機場到著好快辦理好入境手續 今次我哋先會入住兩晚上野嘅BnB，一出海關我地即去買飛，因為經已黃昏（其實5點幾，日本已經天黑）所以我地都無去計用咩方法出市區最平，只係要最快，所以選擇左Skyliner~成田直接到京成上野～單程要2470yen, 其實我知道可以網上預訂，可以平少少～不過太趕急，無硏究，詳情可以睇： http://www.keisei.co.jp/keisei/tetudou/skyliner/tc/sp/tickets/coupon.php 車程Around40分鐘，成田直達京成上野站～我地今次book 嘅BnB 響上野住宅區～ 呢間民宿我響Air BnB book 嘅，1000HKD 一晚，京成上野站一出左轉，行大約15分鐘先到，其實都好遠，最重要拎埋行李拎埋粒豆，確係辛苦～唔建議無自駕嘅朋友～ 不過呢間民宿真係幾大，一房一廳，適合自駕同鐘意住大啲地方嘅朋友～另一好處係，民宿地下就有租車公司，第三日一落樓就可以拎車，方便～ 第一晚只能夠響上野走走～ 同幾年前比較～變了，旅客多左，又無嘢買，不過對於豆哥黎講咩都好新鮮～佢最開心係可以食crepe~第一次食，見到即變心心眼～ 點擊圖片放大
