小豆兒：兩歲四個月 遊日經驗：四次 日本～我認為帶BB去係可以好輕鬆，因為機程近，環境乾淨，而且設施完善，的確係非常適合帶小朋友去旅行 小豆分別去過日本嘅九州，四國岡山，沖繩，東京長野~ 以下一些實用資料，希望可以幫到準備帶BB出發嘅爸媽們~ 1) 衣：幾次帶豆出發都係初夏同秋天，唔需要成日換衫，所以都係按日數帶T裇同長/短褲，日本夜晚通常比較涼，所以都會帶定外套~ <尿片方面>我只會帶定8-10塊，去到日本首日通常我會安排去西松屋，阿卡將，玩具反斗城呢啲買BB野嘅景點，所以去到先買，叧外有時見到激安，呢度亦係買尿片嘅好選擇~ <沖涼方面>響第一次九州行，我就買左Richell 嘅吹氣浴盆帶去用，因為比較衛生同方便，豆仔可以坐響浴盆沖，之後豆仔識行識企，我地就唔駛再帶，直接用花灑～另外要帶定用開嘅shower gel旅行set, 仲有私家毛巾～ <瞓覺方面>豆仔瞓覺三寶：枕頭，姆明阿美被，一同奶咀～ 2）食：兩歲後嘅豆仔已經跟大人食飯毋須任何準備，至於豆仔兩歲前我都少俾街外嘢佢食，所以我地唔住酒店，選擇左BnB,貪佢有得煮粥仔食，當然的確比較麻煩，之前一日要去超市買材料（雖然唔煮超市都會去），當日又要早起身凖備～以下係尋找最近超市嘅網址，非常準確 https://supermarket.geomedian.com <即食食品>日本當地去到超市，Aeon, 西松屋，甚至玩具反斗城，其實都有大量BB即食食品，只要會熱水坐熱返加粥仔或飯，亦係一個方便選擇~另外，香港亦出左即食粥，呢款同樣方便 <奶粉>奶粉由第一次去九州帶一整罐，到而家兩歲幾只係帶早晚嘅份量，另外，日本有壓縮成粒壯奶粉，試過都好方便 <奶樽>呢個問題大部分媽媽都好煩惱，其實第一次帶豆仔旅行時差唔多一歲，基本上我只係用熱滾水同刷洗奶樽，都未試過有任何問題~ <旅行平安藥>每次旅行出發前幾日就會去家庭醫生度開定兩枝藥水以避不時之需～ 3) 住：<BnB>之前提過，為左可以煮食，所以頭幾次去旅行都係住BnB, 幾次旅程分別住過博多，高松，神戶，岡山，沖繩，東京，基本上每一間都好好，好舒適，地方大，最緊要設備都好齊全，所以都值得推介，當然之前網上見過有些人對BnB劣評，但我認為book之前最好參考下該BnB評論，再作決定 圖下呢間響沖繩市，供應嘅玩具多到豆仔玩左成晚~ 圖下博多呢間住tatami~ 點擊圖片放大 +2 圖上為神戶民宿 <酒店>最近東京長野旅行就可以住酒店啦！當然酒店嘅好處係方便啲同安全感大啲，因我認為BnB嘅缺點係大多響住宅區比較靜，出入都要留心啲（雖說日本治安好好）～ 圖上為Dormy inn Premium Tokyo Kodemmacho Ginza 圖上為沖繩Marriott 4)行：基本上帶豆仔旅行都係自駕遊，好處係時間易控制，唔駛搬行李，行程彈性啲，最重要係豆仔可以瞓晏覺！自駕唯一壞處就當然係貴啦！ <租車>其實租車呢個工程通常交比老公處理，據我所知日本租車公司選擇非常多，我地試過租Toyota,OTS, 最近透過Tocoo!響Nissan 租過車 用Tocoo!租車原因係我地想用一個全日本通用(除北海道及沖繩）嘅高速公路pass(Tocoo!Expressway Pass Plan),呢個Pass 按日數收費，租左呢個Pass 再加一張ETC 咭，就可以響高速公路上任行而不用擔心自駕高速公路嘅高昴收費～ https://www2.tocoo.jp/cn/campaign/index?campaign_id=964 不過有一點要留意，tocoo!租車嘅ETC咭係會先用郵寄方式寄到你所住嘅酒店或者郵局（不寄民宿），若寄郵局就要注意郵局嘅開放時間，事關最近一次我地響上野租車，預約左ETC 咭響租車前一日到郵局取，直到當日至發現係日本假期，率之呢趟旅行用不到呢個Pass，大概估計我地要洗多5千円高速公路費 <Baby Trolley> 最後一點，好多媽媽會問帶唔帶BB車去，我個人認為BB車好重要，小豆攰可以坐，唔坐時就放戰利品，只係推車，的確減少好多負擔~
