喺香港食辣就梗係要食地道嘅港式辣雞煲啦!所以今日山長水遠入咗元朗啦 。可能你會問雞煲道道都有,點解要入元朗先?事關呢間雞煲出名在大肥雞,問過老闆,佢話寧願俾多少少錢入靚貨,都唔想畀人有「呃秤」嘅感覺喎!所以肥雞來貨時,會一隻隻檢查夠唔夠肥,如果太瘦會退貨㗎。果然,小店就係爆CP值! 麻辣香蔥魚皮($35) 喺香港真係唔多地方有得食爽鯇魚皮,就算有都要$50起,而且仲係有限量供應添!不過同樣分量,學利就只需要35個大洋。我都幾食得辣,呢個魚皮只能叫小辣。不過就好爽脆,食嘅時候連埋啲薑蔥一齊食真係好夠香! 辣度:★★ 推薦度:★★★★ 學利雞煲 $208(一隻)/$118(半隻) 圖片分量為一隻雞,啲雞真係多到就嚟瀉出嚟啊!價錢方面,唔稱得上平亦唔算貴,不過就真係物超所值啦!事關每枱叫雞煲嘅客人都會獲贈生菜一碟 。最重要係每一舊雞都好厚肉,大大舊,冇得輸!味道方面,雞煲真係好香口,但中辣都唔太辣,反而偏甜。雖然係咁,但香味真在難以抗拒,連胃氣都特別香! 辣度:★ 推薦度:★★★★★ 配料 牛白肉($78) 牛白肉又叫胸口油,係牛胸骨嘅軟骨位。呢個配料我係十級推薦大家食嘅,因為佢入口真係非常重牛味,雖然佢叫胸口油,但入口絕對唔會感覺太油,而且口感爽脆。 推薦度:★★★★★ 即炸脆嚮鈴($48) 即炸嚮鈴上枱真係熱辣辣,夾嘅時候要好小心,以免夾散。由於佢係即炸,所以浸一浸好快可以食得。 推薦度:★★★★ 鮮豬潤($38) 呢個豬潤幾大塊,食落口唔會鞋,而且好滑! 推薦度:★★★ 香港好多人都唔太食得辣,而學利嘅辣就fit哂香港人,大辣真係非常辣,中辣就啱啱好!食過咁多間雞煲,呢道嘅雞係最肥最抵食;而牛白肉呢味咁罕見嘅火鍋配料亦只售$78!除咗食物美味,性價比實在太高! ---------------------------------- 元朗學利 地址:元朗泰利街大興大廈H地舖 營業時間:07:00-00:00 電話:26380504