心情唔好唔一定要食甜品，有時候可以選擇一樣安撫心靈嘅食物，佢唔需要好好味，但會令你情感爆發。世間上會有一樣咁嘅食物嗎？我食過，我真係食過！ps仲幾好味！ 帶住沉重嘅心情嚟到大埔，先喺大埔中心落錯車。然後我憑住飄忽不定嘅iphone定位尋找廣福街市嘅位置。沿路又不停問路，最終用咗45分鐘嚟到廣福村啦！ 大佬59號舖喺邊啊，頹到無勇氣喺街市問路。最終喺街市又打轉10分鐘，我找到了！ 行到門口我已經見到知音！黯然銷魂肉燥飯！仲有「好難吃牛肉麵」！ 雖然選擇多，但已經難阻我食肉燥飯嘅心。 點擊圖片放大 腦細你都幾寸喎「趕時間 唔好嚟幫襯」，仲要日日限炒兩碟？！ 有性格我鐘意！ 我：「腦細唔該要好難食牛肉麵同黯然銷魂飯啊！」 腦細：「拎走定喺到食？」 「喺到食啊唔該！」 「一個人食2樣？你食唔食到啊？扣底好嗎？」 就係咁我一個人叫咗2樣嘢食。其實都唔洗等好耐嘅，10分鐘左右，熱辣辣嘅難食麵已經送上我面前。 好難吃牛肉麵(連飲品)$38 我唔太清楚老闆難食嘅定義係乜，對於呢碗麵我覺得唔算非常好味。湯底有啲甜，我相信有落味精，麵質煙韌，本身比較喜歡爽口彈牙嘅粉麵，所以唔係十分喜歡。 不過最驚喜係牛肉！好入味好淋，口感好好！而且幾厚切！一碗有5片！$38我覺得好值！ 食食吓最期待嘅食物終於上枱！ 黯然銷魂肉燥飯(連飲品)$34 真心，呢個飯真係幾好味！肉燥係用肉碎、肥豬肉、洋蔥炒成，超入味，送飯一流！ 呢隻係有花紋嘅茶葉蛋，蛋黃都勁入味！無得輸！ 本來食得好地地，暫時忘卻憂愁。點知....點知食食下有wasabi，嗆親之餘係咁標眼水。果下低落嘅情緒返哂嚟！ 而且食食下，老闆忽然唱歌，當時自己心情唔好，仲喺一個坐喺街市食黯然銷魂飯，我覺得自己真係好man啊！ 埋單時，我問老闆：「點解叫好難吃牛肉麵？」 老闆：「你咪問，係咁嫁啦！」 「咁點解叫黯然銷魂飯嘅？」 老闆：「咁你依家黯唔黯然啊？」 我低下頭，接過找回嘅零錢就拂袖而去...... ---------------------------------- 地址：大埔寶湖道28號廣福商場廣福街市59號舖 ---------------------------------- 以下附有1分鐘路程示意圖： 街市門外係前往荃灣嘅73x巴士站。 街市入口有「大昌食品市場」嘅字樣。 一行入街市就係「51彩虹」報紙檔，請轉左邊直行。 一直行會經過「永定堂涼茶」、燒味店。 行到尾見到「廣福商場辦事處」轉右，再行一小段路。 ---------------------------------- Facebook page： https://facebook.com/Hkgyummyyummy
