個人真係好鍾意食野，同埋好鍾情地道食物同小店或者傳統老店多過打卡連鎖食物/食店，生活响一個打卡為主既氛圍下，我作為一個女仔其實都幾另類。今次食到入粉嶺，尋找本土特色小食，第一炮梗係由細食到大既混醬腸粉。呢間好似好出名，上網好多都有人介紹，但我就淨係叫左份腸粉，因為我好耐冇食過好食既腸粉。依家市面既腸粉最大既缺點係唔夠熱同質地好硬，好明顯係蒸既時間唔夠耐。 起初都冇咩期望既，諗住入到黎咪試下啦，點知佢左知驚喜我喎。見佢既蒸爐排出既蒸氣源源不絕，所以腸粉熱辣辣唔在講，而且質地柔軟，好似細細個食開嗰種質感，正。 而且個醬都幾驚訝，因為好多時我依家食開既麻醬係由花生醬開希當麻醬既，但呢度個醬食得出真係芝麻醬，成個混醬提升晒。好味😋 細細個既感覺返晒黎～ 呢間群記出名豬手，門口成日大排長龍，不過好彩我地等左大概30分鐘就有位。黎到當然要叫豬手麵再加個淨牛丸啦。佢呢度個豬手同出面既好唔同，因為出面大部份豬手都會整到好淋身、好膠口咁，但呢度完全唔係，呢度啲豬手肉質好有咬口，而豬皮係半膠口狀態，有膠質得黎又有咬口，我鍾意❤️而牛丸都唔失色，牛味香濃、夠晒彈牙，食得出真係手打出黎，果然係孖寶，正😄 題外話，佢個辣醬都好好食，食落唔似辣醬似XO醬多啲，配豬手一齊食會更加錦上添花。 最後路經一間麵包舖，見到佢自己有工場，由於我鍾意食包同喜愛食自家製既包（絕對唔鍾意依家連鎖又凍冰冰既包），所以雖然飽飽地都買左個double菠蘿油同熱辣辣既雞髀包食，簡直係增肥呀，哈哈😆以上純熟個人口味同偏好，未必個個都鍾意食，所以最緊要係去食你自己想食既野，令自己開心😚
