呢一、兩年，因為疫情好多事情都不能於正常情況之下舉行，以花展為例，以往都會於維園舉行，但因為唔想大量人群聚集既關係，就於是分為18區舉行而且仲不能入內影相只能夠遠觀而已。曾經想行均18區留影，可惜就好似呢一年黎一樣計劃總比不上變化，所以都只能夠小小地去左4區。 第一站：深水埗區，展覽位於荔枝角公園內，其實佢最靚嗰一部份我影唔到，因為嗰一part係响一架木頭車裝飾上裝上滿滿既鬱金香，色彩鮮艷奪目，比起主展區既這個配襯靚好多。可惜我沒有航拍攝影機，所以只能夠將美麗留在我既腦海中，不能夠分享及紀錄～ 第二站就是黃大仙區。此展區位於獅子山公園內，相信主題係中式園林設計，都真係幾靚既，中式設計既主要元素都包含晒，就好似小橋流水、涼亭、荷花池等等，幾美輪美奐，可惜佢位於公園之深處，如果不是有心去睇既話，真係都幾容易將此展覽忽視的。觀賞期間有段小插曲，就係有位3-4歲既小朋友將展覽中既花摘去，同時有幾位年長之太太都有輕聲解釋比小朋友知不應採摘花朶破壞展品，可惜同行之家長聽罷後都無理會，仲鼓勵小朋友繼續採摘並且話要將最靚嗰d摘返屋企，年長之太太就繼續阻止小朋友並且與那位家長理論。可惜家長繼續當聽唔到仲話要帶小朋友去第二度再摘而且愈行愈遠同走埋添。對咁細既小朋友黎講，家長既身教真係好重要架～ 第三站，就係香港後花園西貢區。位於寶康公園內，不過我個人認為欠缺左小小特色。佢比我既感覺係將好多靚既花放埋一齊就算咁囉。可能我唔識欣賞啦～ 我既花展最後一站係東區園圃。佢既主題一望就知係日式庭園，亦係我最愛嘅庭園特色。以往可以去旅行既時候，去親日本都會有一日要參觀不同既庭園，就好似好多人都去過既兼六園、金閣寺、銀閣寺、二條城等等，尤其愛行兼六園同二條城。日式庭園總給我一種禪既氣氛，在內閒逛總有種心情平靜既感覺，行完之後就好比禪修完畢。可惜今次呢次花展既公園位於市中心，舉頭望全部都係高樓大廈，唯有同自己講望梅止渴先啦～希望快啲可以回復以往周圍飛既生活啦～
