近期發現一間新派酒樓,位置好近新墟凱都戲院同新墟街市,裝修幾靚,一啲都唔似傳統酒樓。有梳化、霓虹燈佈置,感覺幾舒服。而且餐牌有好多新派點心,令人好想去試下,包括黃沙潤腸、南瓜煎堆仔、蝦膠釀茄子、雪山叉燒包、蝦將軍炒腸粉、藥膳雞腳等。茶介都只係$3,而且除咗傳統中國菜,仲有日式玄米茶,熱茶加上茶香,香味一直喺口腔徘徊,好正!今次兩個人食咗 7 碟,包括籠太子蝦餃皇、鵪鶉蛋燒賣、名醬蒸鳳爪、鮮蝦菜苗餃、翡翠帶子腸、海皇芝士千絲卷、多汁蟹籽小籠包等。臨走𠴱陣,仲買咗鮮芒果布甸同椰汁桂花糕!(餐牌放文末)點擊圖片放大 +2 籠太子蝦餃皇 HKD 31蝦餃大粒,蝦有鮮味及無雪味,唔加醬汁都得;而且肉汁多,蝦又大隻爽口;加上皮薄餡鮮、充滿光澤感,唔會一夾起就穿,皮薄度輕輕透出蝦餃肉,感覺 so good! 鵪鶉蛋燒賣 HKD 28上枱已經聞到好香,鵪鶉蛋大大粒又幾香;咬開一半之後,燒賣都唔會散開;蛋夠熟,燒賣肉餡夠滑,個口感唔錯! 名醬蒸鳳爪 HKD 23呢個醬汁對比傳統酒樓無咁濃味,配上軟滑鳳爪,再嘆多啖茶,都舒服!鳳爪底仲有啲狗仔粉,撈埋個汁食,正! 鮮蝦菜苗餃 HKD 24估唔到有呢款餃子,一籠有 3 件,同樣都係皮薄、通透、有光澤;菜苗同肉餡比例平均,口感幾滑,而且夠多汁,值得一試! 翡翠帶子腸 HKD 27未試過呢款腸粉!一碟有好多件,每件都有帶子同芥蘭頭餡,分佈平均;估唔到呢兩款食材放埋一齊又幾夾!芥蘭頭好爽口,又夠熟,配埋腸粉又幾夾。每件腸粉至少都有2~3粒帶子,爽口無雪味,幾特別。 海皇芝士千絲卷 HKD 27千絲卷內有蝦、芝士,口感爽口又濕潤;外層有炸得香脆同乾身嘅粉絲,連埋餡一齊咬,多重層次口感好特別。 多汁蟹籽小籠包 HKD 25初時職員同我講,隔離有喼汁同豉油,不過我最後都無沾醬汁;因為小籠包裡都有濃郁湯汁,好夠味,唔需要額外醬汁。而且小籠包皮薄,仲有細鍚紙盤載住,唔怕一夾起就穿啦!肉餡軟滑又夠味,配埋湯汁一齊食,爽! 整體送餐及上菜速度快,唔需等好耐;仲要茶介只係 3 蚊,唔駛加一,仲有咁多款新派點心,值得試! --------------------------------免責聲明:是次產品/產品資料是自購的,本文章所發表的全部內容均屬個人意見及感受,並不代表該品牌之言論及立場。如需協助或希望獲得更多有關產品資訊, 請直接聯絡該品牌查詢或和尋求相關專業意見。如從而引起任何損失或法律糾紛,本人概不負責。希望大家喜歡我中肯的分享更可到FB及Instagram看我平日分享:FB Fan page( Szesi Blog): https://www.facebook.com/szesiblog/Instagram:SzesiblogContact Me 歡迎任何合作和試用或出席活動Email: hoszesi@gmail.comFanpiece|She.com|Ubeauty|Blogspot|Weshare|Girlab