第一站：名古屋城。 名古屋城對一啲唔鐘意睇咁多文化野嘅travelers應該起唔到吸引嘅作用。 入到去名古屋城有得睇復修左嘅城堡內部，日本人保留咗城堡係用扁柏木建造嘅特色，係入面行嘅時候都會聞到陣陣木香。 圖入面嘅呢一棟野保留咗好多文物，介紹日本嘅歷史同埋風土人情，仲有俾你體驗下以前啲日本人點樣建造呢棟咁宏偉嘅野(都係搬下石遮)。上到頂樓可以睇到名古屋嘅景，都幾靚㗎。(但當日天氣時陰時晴，唔係咁靚) 仲有，係個城入面可以同啲cosplay歷史人物影相(笑) 第二站：熱田神宮。 今年咁啱係熱田神宮創立1900年， 話說以前第二次世界大戰都冇炸到佢，只係炸爛咗其中一個鳥居，十分好彩。 熱田神宮係我成個旅程入面引象幾深刻嘅一個景點。 本身只係一家人去行下兜個圈，冇野行就早啲走去大須商店街，點知俾我地撞到一個住熱田神宮附近嘅(識英文嘅)伯伯，(佢又咁啱揀仲我地)自己過黎同我地介紹熱田神宮。熱情伯伯幫我地解籤(我地唔識日文)，又帶我地行入去個殿後面條路拜祭神明(山，水，木)，一般外地嘅遊客都唔會識去架！ 仲要俾我地咁好彩撞正有日本係嗰度行婚禮，睇咗一陣，好正！
