第一次在西班牙的青年旅社打麻雀! (好好笑) 第一次搭HK$1,500的的士! (好肉痛) 第一次miss左班機同第一次瞓機場! (好淒涼) 第一次淨係食先古力做晚餐!( 好難食) 講左咁多第一次，大家都應該估到我哋發生左咩事喇! 最後一日在巴塞的時候，我哋已經去晒我地想去的地方，又唔想離開我哋嗰"半山區"hostel，於是好乖地留在hostel度等差唔多時間先出發去機場。 我地呢班坐唔定的馬騮緊係到處explore啦! 我哋去到Hostel的活動室，即刻search有咩玩，真係天網灰灰，竟然俾我哋見到迷你版的麻雀。我哋二話不說﹐即刻開波! 至於我哋的賭本呢係健康到不得了的----蘋果，總之贏得最多的一方就有兩個蘋果。我已經唔記得我哋係雞胡就食得，定三番起胡。結果係贏左兩個蘋果的人是---在下是也!唔係SY叻，只係我的朋友仔疏於練習姐。但係我冇記錯的話，我的兩個蘋果到宜家都未到手。 玩完一輪的中國國粹後，我地施施然拖住嗰大行李走喇!我哋搭返機場巴士去番Barcelona機場，到左機場找左個靚位，等登機!點知，惡夢開始喇! 我有一個朋友仔，好醒目，等左一排都未見到我地要搭的嗰班機。已經醒水地叫我地攞番張e-ticket黎睇。仔細一睇，原來我哋去錯機場。我哋嗱嗱林衝到counter到問嗰機場點去，有咩交通公具去到。嗰counter姐姐，你哋要去的機場係距離呢到百幾公里的countryside機場，你地班機仲有1個幾鐘頭起飛，你地趕唔切架喇! 橫又死，掂又死。我哋當時決定摶一摶，飛的去。我哋叫左叫counter姐姐幫我地翻譯左d西班牙文(因為當地司機唔識講英文)，就飛奔出去搭的士。 嗰的士司機，睇完張紙仔都好快手，即刻幫我地放好行李，即刻開車。呢位司機真急我哋之所急，有時我哋偷望佢的咪標。見到佢標到140公里，我哋都唔知應該叫佢快d定慢d。結果我哋大概用左個鐘頭多少少的時間，俾左我哋人生最大舊的的士錢----150歐羅，都係上唔到機。真係好慘啊!好肉痛啊! 更加經典的，下回再續!
