第五波疫情真係令人人心惶惶，身邊識既人一個接一個中招，再加上之前出現盲搶炎，防疫用品/藥物同新鮮食材都難求，更不用說烘焙用既麵粉。想苦中作樂整下蛋糕都唔容易，麵粉一直缺貨，望住廚房既櫃，見到仲有上次整完白糖糕既粘米粉剩底，又醒起其實粘米粉都可以代替低筋麵粉整鬆軟既蛋糕，咁就唔諗，即刻開工整喇！今次用蒸唔用焗，一來無咁熱氣，二來我終於搵到個蒸完灘凍，個蛋糕都唔會收腰回縮既方法喇（之前失敗過太多次，都放棄左蒸蛋糕嚕）！！其實成個做法同普通戚風蛋糕一樣，仲要簡單啲，因為粘米粉唔似低筋麵粉有筋性，個蛋糕糊即使唔用翻拌既手法（用攪拌器狂攪）都唔會變蛋餅，不過老實講，狂攪拌既話蛋糕組織就相對無咁綿密，多左啲細小既窿，但都係鬆軟既~至於用咩方法蒸完灘凍唔會縮呢？就係用一個比模具大同高既耐熱器皿（電飯煲內膽係一個唔錯選擇）裝住，再用保鮮紙包住，最後係外圍拮幾個窿透氣~呢個方法真係失敗過無數次先成功既方法。當然每個人有唔同做法都做到唔回縮，但呢個方法對我十分有效，依家每次蒸蛋糕都唔駛再擔心會唔會又浪費食材，畢竟依家資源有限。。。 平時蒸完可能仲要等一陣,悶下佢,怕溫差太大,蛋糕會回縮,但呢款蛋糕完全無呢個問題, 蒸完40分鐘即時拎出黎攤凍, 打側放,左右滾動, 等蒸汽慢慢散發個蛋糕就自己甩模, 好容易就脫到模~切件後黎到試食一環喇~個蛋糕真係好鬆軟, 因為少甜,食落仲帶到有陣淡淡既米味, 重點係回彈力十足, 任我按都唔會塌,好有滿足感! 有興趣可以一試!材料 Ingredient:70克粘米粉 70g Rice Flour 30克糖 30g Sugar3隻蛋 3 Eggs40克牛奶 40g Milk15克油 15g OilIG:https://instagram.com/sweet_potato_mui?igshid=vl5lahd6ycx0FB:https://www.facebook.com/蕃薯妹sweet-potato-mui-100899004763483/
