眨下眼就到虎年喇~除左整唔同糕點，都想比啲新意，試下整同老虎有關既食品。見網上有唔少老虎仔造型既饅頭同餅乾。自問仲未到可以整到咁精緻造型level~但無意間見到橙黑相間既餅乾，其實都可以試下套用係麵包度，做返個虎紋吐司。 首先要諗下有咩天然食材，橙色快諗到既係橙，仲有紅蘿蔔，而黑色就係用竹炭粉。咁岩屋企都有齊材料，就一於試下整啦！ 因為唔想開火，所以唔用蒸既，而係將紅蘿蔔切細加水攪打成紅蘿蔔泥，加埋整麵包常用既材料整左個紅蘿蔔麵團，之後係總麵團再份一小份出黎染色。 咁岩之前整竹炭漢堡包剩左啲竹炭粉，可以加入麵團猜混。諗住份量小就用手猜啦~但猜落先覺得好災難，早知都係用返機猜，但洗濕左個頭，都係要繼續猜，好彩幾分鐘後麵團就上左色。 為免張麵團墊染色，快手清潔哂所有掂到竹炭既用具。之後就將麵團發酵至兩倍大。 雖然香港冬天唔凍，但發酵時間都要比夏天長啲，發到兩倍大都要用2個鐘。之後手指沾上麵粉再戳入麵團，如果無咩反彈就算發酵成功，可以將麵團排氣滾圓，再鬆弛下。 終於到整形時間啦！首先張兩個麵團分別擀平至長方形，將長幾闊其實就好隨意，我就大概將紅蘿蔔麵團擀到10cm闊*28cm長。竹炭麵團就9cm闊*20cm長。將竹炭麵團疊上紅蘿蔔麵團，再捲埋一齊。之後就係分割成三條，綁辮子啦~最好將紋路清楚啲既向上。最後頭尾內收就可以放入吐司模，進行最後發酵。 發酵到九分滿就加蓋入爐焗，180°C焗20分鐘。每次加蓋焗吐司，出爐一刻都好忐忑，唔知可唔可以做到頂角吐司。結果又係唔得。。。。不過放涼左再切又ok喎~虎紋都唔錯。 執屋發現有熊仔模，新年新搞作，就用佢再試整多次。因為竹炭粉都用哂，就諗下屋企有咩可以取代，試左可可粉，整出黎又ok喎。味道都唔會唔夾, 因為紅蘿蔔味好淡, 唔講都唔知。 如果屋企有小朋友, 加2粒朱古力豆做眼睛, 佢地見到實好開心!有興趣可以試下~ 材料 Ingredient: 紅蘿蔔泥180克 Carrot puree 180g 糖20克 Sugar 20g 鹽2克 Salt 2g 植物油10克 Vegetable oil 10g 高筋麵粉250克Bread flour 250g 快速酵母2.5克 Instant Yeast 2.5g 可可粉/竹炭粉5克Cocoa powder 5g IG: https://instagram.com/sweet_potato_mui?igshid=vl5lahd6ycx0 FB: https://www.facebook.com/蕃薯妹sweet-potato-mui-100899004763483/
