上篇講到係墨西哥城機場轉機，停留左4-5個鐘，之後又上機，搭多6個鐘去秘魯既首都利馬。因為都係搭墨西哥航空，所以同上篇講既體驗差唔多，有興趣可以睇返。唯獨係今次算係飛短程，所以坐位就3-3。杯麵同眼罩就無喇，戲既內容都係果d，食左餐晏晝，今次攰d，所以呢程機瞓多左，不知不覺就到左利馬。 26/01 終於過左一日，到達利馬係當地時間凌晨00：10。出境好簡單，亦好快，但到最重要既一環，攞行李！點解重要呢？因為出發前爬文都見唔少blogger話自己行李寄失左或者寄左去第二度or行李delay等問題。導致我地唔敢帶2個26寸喼。直到我地等行李既時候見到我地個大喼，即時鬆左口氣。不過與此同時，我地發現行李既鎖有比人拗過既痕跡，都唔知係咪海關想偷野，搞到我地自己都差d開唔到喼，不過好彩無野唔見。 以為到左秘魯利馬就可以返酒店？NoNo...仲要搭多程機先到我地第一個目的地 -- Cusco。啊~依家諗返都覺得攰，仲要等多4個幾鐘先搭到下一班機。。。為左支撐住我地疲憊不堪既身軀，食 係當時最好既解決方法。我地行去departure gate 既二樓，果度有個food court， 岩哂我地呢d窮遊既旅人。我地本來想食當地出名既烤雞Pardo's Chicken, 但當時係凌晨，只賣早餐。。。而早餐都係西式典型既面包加隻蛋。所以我地只好揀隔離既KFC (因為都係雞：p，就試下秘魯既KFC有咩唔同）。 叫左個典型兩件雞set同雞卷set。查實味道就無咩唔同，係呢邊多左樣名物--Inca Kola。金san試完就話味道同忌廉一模一樣。（哈，唔好以為改左個高檔少少既名我地就唔認得你！Erm...其實可能係忌廉先至係偷左人地身份果位呢~）Anyways，我地食緊既同時d清潔姐姐都分區打掃緊，為免阻住佢地，我地快手食完又去check in 喇~！ 題外話，其實食食下KFC我突然自己嚇左嚇自己，因為我地剛到埗既時候去departure gate櫃檯果邊係唔見SKY airline呢個check in 櫃檯，亦因為當時仲早，顯示屏未有show到我地嗰段時間既航班，所以我無為意。但心血一個來潮，醒起以前喺歐洲搭親廉航都要去另一個勁偏僻既機場（同大牌航空唔同機場），當時心諗SKY airline無櫃檯會唔會都要去另一個機場搭。我即時上網搵下利馬有幾多個機場，好彩搵到都係得一個機場，嚇左一跳。 食完KFC，我地就早少少去睇下究竟無SKY airline櫃檯要去邊check in?!但原來都係自己諗多左，一去到departure gate，一列都轉左做Sky airline既check in counter，當下放心哂。我地係check in counter 前就要排隊，比職員check下有幾件hand carry 行李（25*35*45cm)，一個人規定左只可以有一件，跟住地勤會幫你係hand carry上加個tag，之後先再排drop bag條隊or check in 條隊。 我又係懶，無提早online check in，排左check in 條隊，但可能時間早同搭細機，好快就搞點。見仲有些少時間，我就諗住唱定少少秘幣，驚去到Cusco早（~6am），找換店未開，搭唔到車返hostel。雖然都知機場唱錢實係唔抵，但無估到貴之餘仲要收commission fee！1:3.2既匯率變左1:3.11。。。食水好深！好彩只係唱左USD10（但亦可能因為唱得少先要收佣） 。 Anyways，都係自己擔心多左，入到等侯區其實都有找換店，去到Cusco機場，找換店更加係一早開左。 講返Sky airline，整體感覺唔錯，以浪漫既紫色為主調。雖然細機，但上機會分批比Starpass同特殊有需要人士優先上機。 機上座位係3-3分佈，行李架都幾深，而且可以拉抵，比較容易擺放行李 其餘既就同正常廉航一樣，無咩特別好或者特別差。雖然係短短個幾鐘既機程，但我都係攰到瞓著左，到醒返已經準備降落，比我見到靚靚既日出！！ 秘魯上空既日出 降落都唔算好“鄧”，總算到達第一個目的地--Cusco 啦！！ Sky airline既停機坪 可能晨早，過關無咩人，過關職員又無問問題，好快就可以去攞行李。Cusco機場細，得2、3條行李輸送帶，而且隔離就係租車店、找換店、 call 的士等既店鋪仔。Inca Rail同Peru rail既counter都係度，網上買左火車飛去熱水鎮既都可以換埋飛。所謂既飛其實都係A4紙印出黎再cut一半，就係格式唔同左。換飛既時候職員會簡單講下幾時要到車站，記得帶換左既飛同護照。行李只可以8kg（一個backpack既size）等等注意事項。 職員會邊講邊係張車票highlight重點~ 如果想知道點樣提前係網上購買SKY airline 機票同火車票去熱水鎮，可以參考返行前準備既交通篇。2020年新春遊南美(2) — 秘魯+玻利維亞11天 (Peru and Bolivia 11 days) 行前準備–交通篇(訂機票+火車票) 換完火車票就行出機場搭的士，其實我出發前做左research，的士由機場返市區大約5-6sol., 頂盡加埋行李都係10sol.。但的士司機一開價就25sol.，我就還價10sol.。佢地一班司機苦笑左一下話20sol.，平時既我係會繼續再講價，但果刻唔知太早未瞓醒定係高山症，confirm 左係兩個人20sol.之後就say左 ok (記得同司機講好數先上車! 特別要confirm係美金定秘幣)。但之後個秒又後悔左~唉！有時講價真係要厚面皮d，同埋堅持真係好重要！不過心諗算啦~咁早，人地都係搵食姐，出黎玩，蝕少少好正常，我都算盡左力，比佢開價底左d架啦！(-_-;) 機場外既停車場 話說Cusco都算高海拔，都有3,399公尺，但我同金san到埗時都無去拉薩(海拔3,650公尺) 果時咁喘氣(當時只係提前一個星期食紅景天)，亦無心跳快到要暈既感覺，可能今次我地除左提前一星期食紅景天，仲聽醫生話， 提前一日係墨西哥轉機時就食高山症西藥。不過每個人既身體狀況都唔同，醫生都講過每次去高海拔既情況唔同，今次無事唔代表下次無事(=.="講到好嚴重咁)。Anyways，旅行都係想玩得開心又放心，所以可以預防意外發生既事就盡量做喇~
