好不容易又一年，農曆新年，一個又愛又恨既節日。對於三姑六婆每年必問加無限loop既尷尬問題，我選擇逃離香港，搵個容身之所，今年選擇到地球既另一邊 -- 南美。 至於點解會揀南美。。。無他既，有平機票囉~：p可以剔走bucket list既天空之城同天空之鏡，順便踩個點打個卡~上年9月又比我見到有平機票唔駛經美國（即使普通轉機都要搞簽證）去南美, 可以慳返次簽證費，仲要係新春時段，唔係唔去丫嘛~（搵個理由去旅行，yeah！） 不過，所謂平機票其實就係用時間換取金錢，係咁轉機（無計，窮人窮遊就係咁玩），有d仲要自己駁返岩d上落機時間，都咪話唔煩~但為左滿足自己對世界既好奇心，無法啦！講返重點先，行前準備既第一步就係買機票。無錯，一個旅程既來回機票連稅要價幾千蚊（就黎過萬），無返咁上下勇氣都買唔落手，重點係，你唔夠膽獨遊，或者無旅伴愿意請假陪你，呢個bucket list既item應該都長期刪唔走。。。而我好興幸識到金san，一個願意陪我癲既終身伴侶(旅)。 每次去旅行我都鐘意有個plan，唔理係一個大概既行程定係詳細到幾點要去到邊既行程（通常同父母去旅行就要plan到好仔細），總覺得有行程先有安全感。不過今次就算你唔想plan行程都要交份行程表出黎，因為玻利維亞簽證既其中一份文件就係要行程表，打黃熱病疫苗都要比份行程表醫生。經過爬文，綜合其他旅人既行程，再配對返我既旅行日子，最後得出以下行程。 以上呢個行程我用黎做玻利維亞簽證，同打針見醫生時用既，但我到Puno時因為身體不適，改左如下high-lighted既行程。 其實呢個亦係我出發前既擔憂， 一直覺得自己準備左好多(訂機票住宿, 打針, 買火車票, 買sim card, 買旅保, etc.)， 但又怕玻利維亞簽證唔成功， 雨季既天氣會影響行程， 好多野都唔夠擔book住， 所以又好似無咩準備 (未買馬丘比丘門票, 未訂過夜巴士票, 未訂Uyuni住宿, 未搞網上簽證--直到出發前一晚先整,etc.)。 我爬左好多文，見到各式各樣既趣事/怪事，但唔到自己親身經歷都唔知會遇到咩事。 而整個旅程，我都算係不幸中既大幸，雖然遇上上吐下瀉， 但訓足20個鐘頭又係一條女漢子。最緊要既係無穿無爛， 平平安安咁返到屋企，亦令我有機會分享返今次旅程既點滴 (因為今次旅程比其他準備得仲要多，想記錄返，可以比日後既自己或者準備出發既旅人一個參考)。
