終於到行前準備既最終篇，呢篇主要講D瑣碎但又重要既item。 旅遊保險 出發前要記得買旅保，買旅保，買旅保（重要事情說三次）。買左機票，訂埋酒店，大概plan左行程就要買保險，touch wood當地係你出發前有罷工、恐怖襲擊等意外要除消或延誤行程都可以claim保險，但前提係你買左旅保先有呢d不利消息，如果cancel左行程先買就claim唔到。（不過通常到我plan完行程已經係出發前幾日：p)。市面上有太多選擇，唔知揀邊間可參考Money hero，佢會因應4個重點保障項目（遺失手提電話、租車自駕遊、恐怖襲擊、潛水/滑雪/遠足等業餘運動）幫你比較各大保險公司既受保範圍。我通常會因應唔同旅遊地點同行程而買唔同旅保，好似今次南美為例，治安比較差，最多偷竊同搶劫，所以我會重點考慮有得claim手提電話，相機同現金既保險計劃，其次，今個行程比較多搭飛機同搭車（特別係會坐夜巴），所以因交通工具上既人身意外保障都會列入重點考慮。仲有一點係最好保險公司有24小時全球緊急服務熱線，以防touch wood需要求救時可以搵到人幫手。(順帶一提，香港入境處協助在外香港居民小組的24小時求助熱線係(852) 1868，利申：未打過亦唔希望有機會打去，所以唔好問係咪真係幫到手) 當然因行程或行李delay等額外支出既保額都可以留意返，再度下投保金額，睇下邊個plan適合自己。 我自己比較左幾間保險公司既plan, 最後揀左Allied world 既優悠樂，計劃一。 電話卡 搞點旅保就到電話卡，比起日韓台泰新，南美電話卡真係相對少。有d sim card只有秘魯，唔包玻利維亞，所以逼住要買全球既sim card。鴨寮街好多，都唔駛點格價，基本上15日,全球上網, 賣$200蚊/張。另一途徑就係可以網上買（fast-simcard: https://fast-simcard.com/product/south_america_15days_data/)，再到實體店：銅鑼灣、觀塘、尖沙咀或機場領取，亦可郵寄，但要另外收費，具體可以參考返佢地官網。）由於今次同金san去，所以就諗住買住一張全球，到當地先再分別買秘魯同玻利維亞既sim card。 記得至少係出發前48小時提交激活時間。 雖然係全球都可以上網，但網速就真係慢到一個點丫! 金san亦因為慢而多次表示不滿。由於我去旅行上網主要係比我報平安同搵路，一般住宿或者好少少既餐廳都有 free wifi，所以我去到秘魯都無特別買多張sim card (t-mobile係慢，但都叫做可以whatsapp報平安)。 去到玻國我地就買左tigo張2GB sim card，主要係for航拍影鹽湖，但其實係鹽湖都係收得麻麻，有幾次因為航拍搵唔到GPS，搞到降落時出左少少意外，好彩都無咩大礙。 玻利維亞主要有3間供應商，viva, tigo 同entel，我地就係La Paz巴士站買tigo既sim card。行運成個巴士站只有兩間專賣sim card，其他賣小食既攤位都有賣，但就貴d。好奇怪既係佢地只有3日或10日既data plan，因為我地留係玻國5日左右，所以只係揀左最平果種3日plan，2GB ，unlimited WhatsApp, 25玻幣(好似係可以用完data再比錢 top-up，但我對上網既意欲唔係話十分大，所以無再top-up)。 其餘時間就依靠慢到不行既t-mobile同住宿/餐廳既free wifi。 因為sim card喺手機既setting都幾麻煩，所以買完記得叫職員幫你整，make sure上到網先好離開丫！ 唱錢 香港比較少地方可以唱秘魯幣同玻利維亞幣，所以都係喺香港換左美金再到當地換當地貨幣。為左有d預算，想知道要帶幾多美金去駛, 我整左以下既行程表包埋預計既駛費。 粗略估計兩個人既當地駛費包住宿係USD1500。 因為聽聞當地簽卡唔係咁流通或者會有盜用卡既問題，所以帶多左少少現金，兩個人一共帶左USD2000（即係每人帶USD1000）。我地唔止去南美，仲會係韓國停留，所以都帶左d港幣去到唱韓圜，同時都帶左張銀行卡，set埋海外提款，以備不時之需(最後美金夠駛，無用過提款卡)。 印象中南美治安唔好，成日有偷野既問題，所以我地各自安排將美金分開收放。除左會放d係腰包/銀包外，仲會用保鮮膜包住，分別放係眼鏡盒內層、運動內衣內層，糖果盒內層，保暖壺既內層等等，總之就分散投資。但記得mark底自己將幾多錢放左係邊，如果唔係真係會唔記得，到最後仲會以為比人偷左:p，自己嚇自己。。。 用保鮮紙包住美金，再放入糖果盒內作為掩飾 但事實我地旅行既時候都見到唔少警察/security guard/交警係度巡邏，幾乎行幾個block 或者幾條街就見到一個，感覺相對安全。 行李 終於到執喼喇！通常未到出發前一刻都唔會執好。爬文睇到唔少旅人既經歷係托運行李成日都寄失，南美人做野又慢又唔負責任，總之整體感覺都唔係咁好。所以我同金san帶左個26寸喼加一個可以hand carry既22寸喼，再各自咩個背包，另外再手提一個環保袋，專門放大衣、頸巾、太陽帽之類既衣物。 我地每人各自放一套衫係細喼，touch wood大喼寄失都仲可以繼續行程，亦唔使為左買補給品而煩惱。事實我地算好彩，行李無寄失，無delay，但就發現去程既時候比人撬開過大喼，鎖都撬到彎哂，仲差D開唔到喼。 回程既時候我地細喼都有托運，又係發現比人開過喼，今次連鎖都換埋（都係黑色密碼鎖，但换左個大少少既比我）唉，有時真係覺得海關有無咁用心丫，為左開喼又唔想比人發現，連鎖都可以搵個相似既換比你。。。）><.... 最後都係要用暴力(將拉鍊整爛)先開到喼，而喼入面D野亦明顯有比人郁過。。。不過都係算好彩，無野唔見。 至於最後我執左咩入喼就可以參考以下check list。 Apps 因為網速問題, 除左WhatsApp好少少之外，其他apps都幾乎load唔到，所以可以download定d offline用到既地圖/翻譯apps, 例如maps.me 。 我地實測左maps.me十幾日，有好亦有唔好。好在出發前可以download定你會去既城市地圖，有網既時候bookmark定d住宿、景點、餐廳等，到當地就算無網用既時候就可以較容易搵到目的地。唔係咁好既係maps.me唔太update，有d餐廳執左或者搬左都無更新到，所以有幾次都係喺咁兜路。。。個人覺得最好係到當地information center or hostel攞返份map，順便可以叫當地人介紹返當地好食既餐廳或有名既景點，做返個睇紙質地圖既旅人，其實都幾有feel，（不過我係路痴，比咩地圖我睇都係會行錯路，所以帶個有方向感既旅伴可能仲實際d：p）。 至於翻譯apps，我就download左Chinese and Western translation，但旅途中我一次都無開過黎用。我同金san本身都唔曉西班牙文， 但因為唔少出名既景點/旅行社等都有識講簡單英文既人，所以即使無翻譯apps，問題都不大，最緊要識簡單既Hola，Gracias，同1-10既數字，一來打個招呼/多謝人都型d，二來買野講價都親切d（我自己係咁覺得）：）。 另外，可以用全球通用既body language！好多時body language已經表達到我地既意思，不過~全球通都會有失誤既時候，有時你以為人地明白你想表達既野，但原來對方又會錯意。雖然有時係會比人老點，但咁樣其實都幾有趣，好多搞笑既事都會變成我地旅途中珍貴既回憶。 行前準備大致寫完，希望幫到準備出發或者有意籌備去南美既你地喇! 有問題都歡迎留言/PM我。跟住就會好似遊記咁，記錄返我同金san喺南美經歷過既點滴。有興趣可以期待下，盡量3-4 日Update一篇，希望記憶唔好消失得咁快~(人大左，記憶力都差左...><)。
