年初七，人日。個個老友都話自己生日，要求禮物。 嘩，一次過咁多份禮物，點買呀！ 倒不如，大擦一餐好過喇。 "放題"，相信好多香港人都啱食，因為提供嘅食物種類多，梗有D食物啱呢班嘩鬼胃口。我先嚟俾佢哋個胃番一番，之後再喺麻雀檯上番佢幾番。HE~ HE~~ HE~~~ "番本"位置超方便，一出旺角地鐵站 B2 出口，就見到 "番本星級日式放題" 喇。 搭兩層扶手電梯上位於 3 樓嘅 "番本"。 7:00 到達，滿面已經坐滿人，但係門口仲有十數人等候。 好睬醒目嘅我已經訂咗位，否則又聽到一大堆 "令我心煩" 嘅聲音及對住一雙雙 "惱火中燒" 嘅眼神。 坐定定，待應即時送上茶。 檯面早已準備到所有餐具及點菜紙。 疊點菜紙仲厚過本黃頁，內裏已編上 A - M。每頁屬於不同種類食物，如：壽司、魚生、端燒物及喝品等。 我快快手點上幾類食品，先行過吓口癮。點知待應嘅反應仲比我快手，呢頭舉手，嗰頭就待應就有示意，真係好難得！ "番本" 有凍梅酒及冷凍清酒任喝。 為咗一陣唔做"水魚"，我點咗枝凍梅酒及熱清酒，轉頭就酙多多俾佢哋喝，我自己就少喝為妙。 當我諗緊嘢嘅時候，酒已第一時間就送咗嚟。 嘩，梅酒真係好凍呀，清酒亦好夠熱！ 因為梅酒及梅酒瓶早早雪喺櫃內，所以出到嚟嘅保證係凍冰冰。另外，有個熱爐坐住清酒，所以保證合乎客人要求。 另外，每種酒都會配唔同嘅酒杯，迎合返嗰種酒嘅份量。呢個安排真係令人滿意。 有酒當前，大家先嚟乾一杯。 叫咗必食及推介前菜：醋漬蘿蔔及秘製三文魚卷沙律。 醋漬蘿蔔好新鮮，味道醃到啱啱好，少少酸，好開胃。 三文魚卷沙律感覺怪怪的。樣子不太討好。 接住天婦羅有及壽司。 天婦羅明顯係剛新鮮炸起，咬落口外層鬆化，內裏熱辣辣。 清晒籃內嘅炸物，發現底紙油淋淋，估計係趕住出貨，未趕得切瀝乾油分。 呢到壽司選擇得11款，不過款款都夠特別，如：火炙三文魚腩壽司、海鹽火灸左口群邊壽司及柚子胡椒針魚壽司。 加上壽司做到一口過，同喺日本食到嘅一模一樣，可以將魚生同醋飯喺口內完全混合。 魚生叫咗唔係好多，所以用碗上。但擺設都好好睇，令人好想食佢。 望落魚生好新鮮，食落都係好新鮮呀~~~ 炸物嚟到，同天婦羅一樣唔覺得油膩。 不過我唔太欣賞炸廣島吉列蠔，粉漿厚加埋有梳打粉味，令到蠔味要同梳仔粉平分春分，唯有放棄外套。 相反，我幾鐘意日式炸芝士年糕，煙煙韌韌，幾好咬口，只係芝士味唔重，未合我心水。 爐端燒我推介孜然牛肉粒串及三文魚芝士薯波。 孜然牛肉粒串好有牛肉味，而且又冧身，令我不斷想 echo。 三文魚芝士薯波味道偏用淡口，但係三文魚、芝士及薯蓉嘅味道又幾夾，互不搶對方味道，食落幾咁和諧。不過一粒都幾飽肚，都係 "一粒上，兩粒止"，否則食唔到其他美食。 卷物及手卷，都係即叫即做，魚生一樣新鮮。 卷物同壽司一樣係一口過，正。 手卷唔太大，可以3啖內食完。我個人比較喜歡細細個手卷，咁先可以俾機會我試多幾款手卷，仲可以借機食多幾塊新鮮脆口嘅紫紙添。 食到呢到，我哋已經食咗唔少嘢，不過班"蝗蟲"好似仲到喉唔到肺，我再 echo 清酒、炸物及爐端燒俾佢哋，等佢哋唔經唔覺喝多咗，等大家都唔記得咗雀局。 以為朋友已經進入 "半醉半醒" 嘅狀態，點知眼利嘅阿詩發現隔離檯有羊架、蟹粥及特大赤蝦刺身等食物，但係我哋檯上疊"黃頁"無呢d選擇。 呢個時候，我先同佢哋講有 "升級體驗"，只要加多 $50，就可以有其他更正斗嘅食物選擇，不過因為今晚我請客，所以決定唔加 $$$。 點知，俾班蝗蟲罵到狗血淋頭 。嗚嗚，真可憐！ 仲有，只3人以上，就可以得到其中一款冬日火鍋：日式牛肉湯 / 血池地獄湯 / 特濃豬骨湯。不過，因為我無出聲，所以今晚大家都無得食。呵~呵~呵~ 朋友怒火中燒，搞到我嘅奸計都失敗，佢哋個個即時提高警覺性。 食咗餘下半小時，待應走嚟提點 "差唔要 last order" ，呢個時候，佢哋仲好清醒話要點埋甜品。 咁就食埋雪糕、雪米磁幫啱啱頭先嘅熱氣食物降降溫喇。 總結嚟講，番本星級日式放題 食物選擇多，夠新鮮，份量細，出菜快，仲開心係待應反應真係夠快，做嘢又勤快及準誠，係好多地方都搵唔到嘅服務質素。另外，番本星級日式放題 環境舒適，地方寬敞到可容納250人，相信喺到開 party 都得呀。 番本星級日式放題 營業時間：Mon - Sun 17:30 - 00:00 地址：旺角西洋菜南街168號3樓全層 電話：3543 1109 Facebook：https://www.facebook.com/FanBenhk P.S.： 返到屋企睇返 Facebook，我先至知 like 番本星級日式放題 fanpage，係有一隻蝦刺身送㗎。 唉，如果班 "蝗蟲" 知道咗 ，睇怕我慘死 ~~~~
