去開7-Eleven買嘢，意外發現有好多美少女戰士嘅精品，行近睇實物好靚。Sailor moon嘅fans記得唔好錯過呀！ 好靚嘅閃石圓鏡，真係好似細個喺電視睇到嘅變身鏡。雖然有水手裝嘅款，但係我都係獨愛粉紅星星鏡。 有齊代表5個美少女戰士嘅鎖匙扣，我去嗰時就淨係得返3款。 呢個午餐盒裏面有埋筷子，仲有醬油格，帶飯盒返工都唔怕醬汁浸住啲食物，設計得好細心，兩隻色都好靚。 美少女衫款式嘅多用途袋，個袋打開都幾大個，可以用嚟保溫保冷，夏天冬天都用得。 最後梗係要抽返個扭蛋掛飾，本來拎咗兩個一重一輕，睇返圖案嘅大細，最重應該會係Sailor Moon，最輕又似係其他款。再拎多一個中間重量嘅，最後成功抽到最想要嘅Sailor Venus。 Yeah!!!仲有好受歡迎嘅髮飾同埋斜孭袋已經見唔到現貨，大家快啲去揀個啱心水嘅精品返屋企啦！
