80日其實話長唔長, 話短唔短. 我識左3個好好既女朋友, 一個四川人, 一個菲律賓人, 一個台灣人 其實仲有一個香港人, 佢係我resort既dive master 除左呢幾個好重要既朋友之外, 當然仲有一d當地既朋友啦!佢地d名都好可愛架! Ali, Asfar, Aslaa, Iby, Latheef, Niushaad, Hussen, Atif, Shabeeh, Nihad, Rafeeu, Moosa, Issey 佢地令我喺果邊有好快樂既日子, 配合埋劉師傅+楊師傅對我既照顧, 我簡直係好幸福既小朋友 結果, 我走果一日喊到非常淒涼 冇錯, 我就係一個咁大情大性既人, 我由離開前一個鐘左右開始喊, 到上船, 到機場等, Shabeeh特登黎送我機... 到上飛機, 坐個幾鐘飛機, 到落機, 一直都喺度落淚, 好似小朋友咁喊! 心好痛, 四川人, 菲律賓人, 台灣人通通都仲有機會見面, 但屬於天堂一般既島上既朋友, 我地仲有機會見面嗎? 如何可以留住佢地既好? 呢一切, 都只可以放喺心中, 帶不走. 或者有一日佢地會忘記我, 而我對佢地既感覺亦都可能會慢慢淡去, 呢一個就係現實既無奈, 亦令我好有無力感. 原來聚散有時, 得到愈多, 亦代表可以失去既愈多, 所以愈過得快樂, 離開時就愈痛苦. 依依不捨又如何, 都改變唔到, 其實, 就算可以改變, 亦都冇可能會選擇留喺果度. 只可以話, 呢個係一個痛苦既transition. 又或者係因為離開現實生活太耐, 要腳踏實地番回原地, 感覺就好似大巴大巴摑醒我咁痛苦! 點擊圖片放大 +2 而好彩既係, 到達Male既時候, 係有一個人等緊我, 如果唔係佢distract左我, 我好肯定會喊到番香港! 離開我既島, 亦代表我既假期開始了! 因為唔可以住喺自己酒店, 同事就幫我用佢既朋友關係book左Anantara Dhigu, 有比較優惠既rate, 但都好貴! 圍番淨係住, 都要3千幾蚊一晚!真係諗番都覺得心痛!! 個重點仲係, 俾3千幾蚊仲一肚氣! 呢間話晒都係有個brand既酒店應該唔會好差! 但同我做果間實在差太遠, 呢個係其中一個有職業病既壞處! 有比較真係會好難受! 點擊圖片放大 +4 喺Male留左一晚之後, 第二日就坐船出發去resort啦! 大概35分鐘就到酒店, 當然, 同一般既酒店一樣, 去到就會有人喺碼頭等待我地 帶我地去reception, serve welcome drink...再完成埋check in既手續啦! (喺我酒店既做法, 就係我地會派人出機場接客人, 喺船上就會serve welcome drink, 去酒店會有酒店高層迎接, 然後由villa host直接帶去villa度做check in, 明顯地係有氣派好多啦!) 去到房間, 難免有少少失望, 佢地既beach villa係冇private pool既, 只有一個building加一個半室外既浴室. (因為我酒店就算最basic既房都有2棟, 一棟係bedroom, 一棟係living room, 仲有private pool, 得water villa冇pool姐) 連住既沙灘, 望出去就有野block住, 加上咁岩係construction, 仲有吊臂添, 都真係有少少灰! (我做果間就對住indian ocean果邊係超澎湃既浪, 勁有氣勢我好中意, 完全一望無際, 另一邊都係好遠好遠好遠先見到對面島! 係好平靜既內海! 總之無論邊一邊都係勁靚既景!) 算啦都係唔好咁麻煩, 好好享受! 第一日去到其實就好輕鬆既, 熟悉下resort既環境, 計劃下黎緊幾日既活動! take it slow, 反正總共有5日4夜, 唔洗急! 再完全可以慢慢玩! Day1就去左泳池游下水, 打下羽毛球, hea下, 由於呢間resort同佢另一間係痴得好近, 只要坐唔洗10分鐘船就到. 所以係可以去果邊食野既, 於是我地就book左去果邊既一間thai restaurant Baan Huraa食野啦! 成個experience都好正!而野食都其實standard啦, 唔會話食完wow左出黎囉!但環境真係好好 Day2首先食左個好滿足既早餐, 就去左dive center果邊研究有咩活動啦! 報左名下晝去釣魚同埋Day3去浮潛既trip! 日頭呢就租左隻kayak去隔黎一個小島度有一個小浮潛點! 其實時間慢慢咁樣過得好快! 由於一日食3餐真係好貴, 所以我地lunch通常都唔會點食. 早餐已經食好飽, 可能下晝我地就喺villa食下我地自備既snacks, 友人仲喺香港走私左d酒黎! 所以玩到有點攰就會番房休息一下啦!! 不過行沙灘望住美景時間就不知不覺會過得好快! 釣魚trip又係好成功咁咩都釣唔到, 我真係未試過釣到魚架喎 -.- 夜晚就去左Fuddan Fusion Grill度食, 呢度每人食2個course都已經要成千蚊港紙落樓架啦! 所以會好肉赤! 夜晚就當然要欣賞下呢個咁靚既星空啦! 慢慢行番villa, 真係感覺好正, 好寧靜, 好感恩. 馬爾代夫真係好岩情侶黎, 可以做既野太少, 2個人可以好專心咁相處, 享受寧靜, 一心一意去愛對方 好可惜, 同我一齊享受既並唔係我另一半, 因為我冇-.- Day3食完早餐就去浮潛! 同喺我resort一樣, 睇到好多魚魚, 好多好多, 仲有好多珊瑚! 下晝番去又係kayaking啦! 曬下太陽感受下海風! 仲有游下水! 樂得清閒, 真係好正! 夜晚食Terrazo! 價錢就唔平啦, 但其實就冇一餐真係好食到爆! 冇計啦, 其實開一間resort要好多錢, 呢d錢都抵佢賺既! Day4就係做SPA既時候啦! 呢個係唯一一個我覺得可以同我酒店比既地方, 各有千秋,不分上下. 呢個SPA我地可以享有40% off, 但都唔平, 只係架! 人一世物一世, 點都叫試過丫麻! 首先浸個沿, 望住出面既風景, 真係好岩couple, 浪漫到爆燈! 之後個massage太舒服我都係喺半訓著狀態. Day5都係游下水hea下就過左! 因為夜機, 所以都喺resort入面留到睇完最後一個日落先走. 我記得, 呢日既日落特別靚, 特別令人不捨... 可以喺Maldives渡假,真係一件好幸福既事! 與世隔絕, 靜靜享受二人世界, 呢個真係一個一世人一定要去一次既地方 而我, 希望會有第二次, 可以同自己心愛既人一齊分享呢個咁美麗既地方. 總結, 去馬代, 真係要做好足既RESEARCH, 好好咁揀一間resort, 如果唔係咁遠去到可能會失望! 價錢同quality好大機會成正比, 所以黎得呢度, 唔好太度縮, 我有同事因為揀左間平既而有點掃興. I <3 Maldives! I hope I will be back : )
