是次旅程, 係為左公司一位intern小妹妹 一位我好錫既韓國妹子 佢入黎公司既時間我剛好不在, 係我去左sister hotel training既那一個12月. 番黎就見佢喺我條team, 佢係一個可愛小傻妹, 好得人中意 我特別照顧呢d離鄉別井冇人冇物既人, 而且同佢都好投契 我建議佢要好好利用呢段離開屋企既時間, 去多d地方, 更加充實 既然佢喺我地酒店做, 都好想俾佢一個機會住我地酒店 所以就俾佢揀一個地方我同佢去, 結果揀左沙巴 機票平, 方便! 兩個人去又好似有d悶, 搵埋其他朋友啦, 叫下叫下, 最後一行5人 2013年4月23-27日 5個人, 分左3班機去, 我小妹同友人W一齊飛, 唯一男友人比我地早一日到, 而友人Y就遲我地2個鐘. 沙巴友人喺我落機果日有事, 所以話會派同事黎接我, 緊係啦, 做野要緊! 落機果下都幾迷茫, 第一次見唔到有人等緊我, 又冇電話打, 慌了 過左幾分鐘, 友人出現, 扮晒野俾surprise我咁哈哈哈! 去出食左d野, 唱左d錢, 再番機場接埋友人Y, 我地就出發番酒店啦! 第三次黎沙巴, 第一次住呢間酒店, 頭2次都嫌遠放棄左呢間, 終於黎到, 今次好驚喜! upgrade左住間超靚既海景房, 勁大, 5個人住一對connecting房, 真係好正! 影下相, 然後就出左沙灘kayaking 然後朋友就接左佢地出去食海鮮啦, 而我就留守因為我約左我沙巴既同事聚聚舊 等佢地收工既同時, 我就欣賞左一個好靚日落! 呢個沙灘真係好屈機, 個日落真係冇得輸! 每次黎到見到佢地都好開心, 雖然catch up既時間好短, 但我好珍惜! 點擊圖片放大 Day2 既然今次係第3次去同一個地方, 就緊係要做d唔一樣既野啦! 去左咁多次都冇機會去既美人魚島! 因為路程比較遠, 而且有時會因為天氣情況而去唔到. 起身食左個超滿足既早餐, 我地就出發啦! 好巧妙地, 仲有另外四個人, 兩個係咁岩喺香港機場撞到既朋友. 呢一日天氣好好, 天好藍, 我地去左潛水+浮潛! 講真果句就係有d失望, 因為呢次潛水咩都睇唔到, 同期望既差好遠 (我之前有朋友睇到海龜) 影左好多相, 仲逼妹子跳左段紅極一時既gwiyomi, 臨走前仲打左陣沙灘排球! 好攰的一天, 但好滿足! 番酒店再睇日落, 真係好正, 影左好多好正既相, 最重要係見證左同事I既7事! 隻拖鞋居然俾隻狗擔走左, 我地真係呆左, 笑到反肚! 晚上喺酒店仲食左一餐好正既italian, 之後我地就再執野走啦. 我, 友人W同埋男友人會離隊2日1夜, 挑戰神山. 點擊圖片放大 +2 Day3, 食埋呢個勁正既早餐, 我地仲偷偷打左d包, 之後我地就先行一步, 出發去神山. 其實我地算係出發得遲啦, 通常要行神山既人好早就會開始. 行神山其實要好早準備, 因為要先訂好山上住宿, 訂到先有得行 而且一定要有個guide帶住我地行, 去到搞埋d手續就出發啦. 一開始都行得好順, 因為練習唔多, 係就係行得慢d架啦, 但都handle到, 亦都好彩有男友人同行照顧我地2個! 因為我地2個都廢廢地!從18XXM開始行, 行行下又落下雨, 條路講不上好好行, 但都算可以 頭段完全冇問題, 中間亦都有好多休息涼亭, 我地吹下水行下, 行到中後段真係愈來愈難行, d級係我半個人咁高! 路又爛, 加上海拔愈來愈高, 點都好, 呢一日行到上3千幾米, 用左5-6個鐘. 慢慢上到去, 又大霧, 又愈來愈凍! 到左之後, 起勢咁食, 保充番能量, 同埋要飲番d熱野暖番個身, 男友人都愈來愈頭痛啦! 佢做開運動黎到空氣稀薄既高海拔地方係會辛苦d架啦!我反而都ok! 我地住果間係4人房, 所以除左我地3個仲有一個新加坡人. 其實都咩都唔理得咁多架啦! 大家都攰同埋要盡早休息, 因為2點就要起身繼續行! 乾唔乾淨已經唔重要啦 (是晚係冇得沖涼架!) 點擊圖片放大 +3 Day4, 2點鐘起身, 係咁e食左d野等埋個guide就出發啦!說真的, 個guide一直既存在感都好低. 不過都好既, 叫做幫下當地人搵錢囉, 日日係咁行山, 辛苦錢黎架! 著晒保暖衣物, 頭燈, 手套就向呢個死亡之旅出發啦! 真係好慘慘豬, 好痛苦, 沿住條人龍黎行, 見到遠處有光既就一直行. 間中有一兩個人行唔到要折返. 行行下得條得一個身位既路, 扯住條繩行, 死都唔可以放手, 因為放手就跌落去就係咁先! 再繼續行上去, 就開始喺岩上行, 好難行, 抓地力唔好, 所以更難行, 去到一個位, 行到好絕望! 行到某個位, 我地要報左到先, 因為咁樣先証明成功行到上去, 落番黎先有証書. 再行, 唯有叫男友人先行, 唔想佢錯過左個日出, 我地就喺後面半放棄咁慢慢跟 呢一晚個月亮好圓好光, 都唔記得係初幾, 好奇妙, 上到黎咁高, 就會見到左邊仲係月亮, 右邊既太陽就慢慢升起啦! 我地2個女仔慢慢行, 其實已經離終點不遠, 但就係爆唔到上到. 但我唔甘心, 明明再多小小就到啦, 但好似有心無力! 終於我掉低左友人, 自己行先! 行行下見到男友人喺個頂度好沾沾, 即係我都到啦! 7點, 終於行到上去啦! 而友人W都默默跟喺我後面, 所以佢都好快上黎啦! 上面好多人, 我地影左d相就落番去啦, 然後又要急急腳落山啦! 上山容易下山難, 我一直都知道, 特別喺咁跣既岩石上, 簡直係極無助. 有支行山杖其實幫助都唔大, 結果我係坐喺地慢慢跣落去, 加上行到對腳已經勁無力, 實在太難受啦!! 真係灰到喊出黎啊! 但只能夠咬緊牙關繼續行落去! 路上既人都會互相鼓勵, 特別係見到d好似我咁弱既人! 番到hostel休息一下, 執埋野繼續行. 不過呢下仲大獲, 中途收到佢地電話, 話佢地差唔多到我地落山既地方. 為左唔想佢地等我地太耐, 只好摩打腳直衝落去啦! 中間天氣仲要勁差係咁落雨, 都唔理啦! 一直冇停過, 計好時間都唔敢休息, 同上黎果陣真係差天共地啊! 趕到啊媽都唔認得, 完全覺得對腳已經唔屬於自己. 百般滋味在心頭, 呢一次旅程實在太難忘啦!而我都好proud of 自己可以做得到! 拖住勁污糟既身體check in近市區既酒店, 沖番個靚涼就出去食飯啦! 食完就去左dup骨, 攰到崩潰啊! 同時間收到個sms, 俾狗擔左隻拖鞋果位同事俾蛇咬, 入左醫院. 由於佢仲住喺第一間酒店, 我地都做唔到d咩幫佢lol Day5, last day沙巴友人又黎接我地食早餐(my fav kaya toast), 之後就喺市內遊, 大家稍為買左d手信. 講真, 呢一日我完全處於行動不便既狀態下, 對腳勁酸! 大家又係時間各自坐飛機番去啦. 我地3個班機係夜d既, 所以仲有時間喺酒店hea下. 於是我地參加左個酒店活動就係整cocktail, 無無聊聊kill下time. 友人再車我地去機場, 就結束左呢個咁特別既旅程 好開心呢次沙巴之旅, 同之前兩次既活動好不一樣. 而當然, 今次, 非常有成就感! 其實, 我都可以做到既事, 即係唔算係一件難事! 喺山上, 睇到非一般既風景!好開心自己做左呢個決定去征服神山, 亦好幸運有朋友同我一齊去完全呢件事! 而更重要既係, 多謝呢個旅程既4位友人, 有你地, 個trip先會咁開心 :-)
