雖然離開拉薩, 但旅程仲未完結 仲有五十幾個鐘硬座大挑戰 6月28-30日 T266 12:25開 RMB451 呢4百蚊人仔買左最漫長又最快樂既火車旅程 一切都係緣份, 世事就係咁奇妙, 永遠會喺你最least expect既時候俾你意想不到既驚喜. 西藏出發既列車, 第一日仲未坐滿, 比起來程有硬臥, 呢度唔舒服既程度真係令人坐立不安 咦, 點解...好似有個熟悉既面孔 波波 (友人), 呢個好似...果日賣西瓜果個人.. 好似係...好似係...我地其實有少少想開口, 但又有d怕醜! 我地一直都同自己講, 喺呢d環境最好唔好同人講野, 唔好俾人知道我地係香港人 我唔係話香港人有幾吃香, 但呢個身份有d危險, 所以唔想招惹麻煩就低調d 丫...之前有影相....睇下咪知囉...哈哈...係啊係啊, 係呢條鏈啦, 件褸都係一樣架, 波波你同佢講野啦! OMG...佢拎左個西瓜出黎!!!係佢啦.... 呢一刻, 佢好自然咁同我地分享佢個西瓜, 而我地都知道, 呢五十幾個鐘, 我地就相依為命啦! 同西瓜哥哥傾計, 發現原來佢係四川人, 去西藏打工, 但唔想再賣西瓜, 所以去廣州睇下有咩機會啦... 佢毫不猶疑咁同我地分享自己既食物...其實人與人之間既關係就係咁簡單. 點解我地要去計算呢? 係, 防人之心不可無, 但呢一刻, 我覺得有點無地自容 頭二十個鐘...好難捱...第一晚, 我轉左五十幾個姿勢, 冇一個舒服, 完全訓唔到 條頸好痛, 時間過得又難又苦... 去到西寧, 有大量群眾湧上車, 大量既意思係, 下, 根本就冇咁多位... 有人係企位啦...仲有三十幾個鐘喎, 唔係啊麻...算啦, 又唔係我企... 慢慢開始, 本身坐3個人既坐位, 變左有4個人坐 慢慢開始, d人互相分享, 互相讓座 我地慢慢開始有bonding, 我幫每一個人都改左個名, 我地...變左好似一家人咁 有大有細有男有女有唔同宗教背景 開始大家一齊鬥地主(當然我地冇啦, 因為我地唔識) 但有佢地一齊, 時間變得好易過, 而呢種打成一片既感覺 令呢一片混亂, 突然變得好和諧 24小時前互不相識, 24小時後卻已經睡作一團 一段好短既緣份, 但比任何野都更美 一切都來得好簡單 淨番既時間, 希望可以過得慢d, 因為, 咁美麗既邂逅, 我唔想咁快就完結 小花, 叔叔, 射籃老弟, 老鼠哥哥, 新哥, 大嬸, 精神哥, 西瓜哥哥, 學問叔叔 你地都過得好嗎? 點擊圖片放大 +3 每個旅程, 點都會有一個終結, 但回憶會延續落去 過客, 就算已經過左去, 都會一直喺心入面, 唔會忘記 多謝你地曾經出現過, 俾我咁美麗既回憶 多謝你地話俾我知, 世界好美, 因為人性好美 簡單往往就係最美麗, 無添加, 令你地更加可貴 世界好複雜, 但你地令我知道, 只要堅持一直做好, 一定會有好人好事發現 你地令我好有信心, 無論去到邊, 都只會吸引到好人 我覺得你地令我好幸福 西藏之行, 睇到呢d咁靚既風景真係好大既收穫 遇到既人同事令我地更加不枉此行 呢一次旅行, 亦都深深咁改變左我既價值觀 : )
