✨✨青衣戲棚-真君誕✨✨ 又到咗一年一度嘅真君誕！超鍾意掃街食小食嘅stella緊係急急腳去掃美食！今年突登早少少去6點到步，所以好多野都唔洗等太耐，大約8點左右好多稍為有特色嘅野都已經大排長龍 今年其實有好多攤位同上年差唔多，見好多人介紹流心玉子，但由於上年已經試過，同埋實在整得太慢，要等好耐所以就無再食 火焰芝士薄餅$28 ［分數：6.5/10］ 而上年大熱要等足一小時嘅原個西瓜，今年係無人排嘅！但佢地都推出咗個火焰芝士薄餅，味道其實唔差，但個餅底其實係兩塊春卷皮，上面有少少肉醬同芝士，但芝士無乜香味，當香口小食ok嘅，但唔算太有驚喜 台式潤餅 $20 ［分數：7/10］ 大大舊即磨花生糖令人聯想起台灣夜市，雪糕可以揀朱古力，雲尼拿，好似重有士多啤梨，花生碎都幾多，再加少少香葉，都幾好食 綿花糖多士 $12 ［分數：6.5/10］ 係戲棚入面，見到有$12蚊野食算好平，多士係生命麵包，上面加咗4粒綿花糖，再放入焗爐，綿花糖都算熔熔地，個多士（麵包）係淋同軟身嘅⋯叫綿花糖包會貼切啲 鵝肝多士 $30 ［分數：7/10］ 鵝肝都算幾大塊，見人地嗰啲煎到都幾燶下，所以我叫佢唔洗煎太熟，香味其實一般般，但入口總算嫩滑，法包烘得夠脆，不過以$30蚊一件黎講，係咁上下啦 龍珠串 ［分數：7/10］ 另一樣比較多人介紹嘅係魷魚筒飯，因為我地已經買咗盒糯米飯食，所以就無試到，反而叫咗串大大串嘅龍珠串，應該係將巨型八爪魚啲觸鬚切成一粒粒再串起，啲龍珠都幾有口感，不過味道就主要靠沙律醬同燒汁提味 芝士薯條$15 ［分數：6/10］ 芝士薯條伏味都幾重，炸完啲薯條之後，灑少少mozzarella上面，再用火燒燒佢就完成，不過令人驚訝嘅係再加咗七味粉落去，芝士本身唔夠香，再加上七味粉⋯我個芝士薯條幻滅了 煎蛋餅 （唔知正確個名係咩） $20 ［分數：8/10］ 雖然唔係好抵又要等好耐，但味道唔錯嘅一款小食，入面有原隻煎蛋，再加入咗粟米粒同少量豬肉，再倒入漿粉而成，熱辣辣同香口之餘味道都幾有層次 榴槤雪花冰 $27 ［分數：8/10］ 食完咁多煎炸野，想食返啲冰凍嘅野，雪花冰無乜人買，所以唔洗等。有5種味道，益力多、朱古力、芒果、榴槤同唔記得。而我就揀咗榴槤味配爆珠，榴槤比想像中濃味，份量都算幾多，唔錯 懷舊拉糖 $12 ［分數：8/10］ 當係小遊戲咁玩下～吹到個糖波一定大小之後就可以拎返枝靚靚糖做禮物，衰咗都唔緊要，都有枝細細地嘅糖～而我今次係第一次玩，竟然成功吹到！拎咗枝天鵝糖仔，不過味道當然唔好太有期望，當挑戰下就好了 ****************************** 青衣戲棚 2016年4月18日 - 22日 （真君誕） 2016年5月7日 - 11日 （天后誕） ******************************
