遲咗半年先講， Laver Cup係Federer有份搞出嚟嘅，當年就係Federer退休前同Nadal最尾同場。當年冇得睇Federer好可惜，2024原本Nadal去，最尾佢冇出現。由於費達拿有份搞Laver Cup，所以佢每一次邊度搞佢都會出現喺觀眾席。Laver Cup啲飛冇Grand Slam咁難買，不過如果想睇嘅就一開賣就買定飛揀靚位。舊年Laver Cup喺德國柏林Uber球場舉行，球場其實唔係好大，就算坐最尾幾行都睇得好清楚。如果想近距離又平啲見到明星，建議買練習場，只需要港幣$300左右，平得來因為冇乜人睇，所以非常之近距離。每一個球員都會安排喺嗰兩個鐘練習，我睇幾個都係Hea住嚟打，唯獨Zverev同Alcaraz對打練習嘅時候認真好多，你見到佢哋冇Hea打，佢哋仲要練好耐，練習場完場佢哋都係繼續打，粉絲梗係一直賴死唔走，最尾再睇多大半個鐘俾人趕走，但其實佢哋仲打緊。Lava Cup嘅賽制係Team World 或者Team Europe達到某個分數就會贏，所以最尾嗰日有機會已經分咗勝負，就只可以睇表演賽，柏林呢年鬥得難分難解，打足最尾一場先至決到勝負，所以最尾星期日一共由朝睇到晚睇咗10個鐘破晒紀錄，大部份球迷認真冇走開。所以大部份人可能買星期六比較穩陣，但如果你搏到咁就星期日抵啲。Uber球場只能進入一次，所以焗住喺球場裏面食同買嘢飲，一定係貴啲，你當啟德場價錢，但係冇計，因為一樣唔俾帶食物水樽，水樽要另外擺，佢哋有專人安排，每個水樽俾個Number你，完場會有職員俾返你。雖然呢個唔係ATP，但係球員都好認真，尤其係Team Europe，所以大家可以買下嚟睇， 2025喺美國，可能遠啲，下年會返返去倫敦，大家可以積極考慮!順帶一題，當然有得買網球用品，當年就喺嗰度率先發售費達拿塊Wilson網球拍，同一系列周邊產品。點擊圖片放大
