話說我諗住同另外三位朋友一齊飛去慕尼黑睇葡萄牙對德國,你知可能係C朗最尾一屆踢國家隊,而我又支持德國隊,所以不惜工本諗住飛去睇一場大型賽事,但係人算不如天算,你又點估到無啦啦有肺炎,全球停頓!好彩係都仲可以退返啲酒店同機票錢,但係張$7000嘅波飛只可以退到一半,就咁蝕咗$3500⋯⋯而家期望旅遊保險有得賠返少少。都冇辦法啦,但係最慘係一心睇德國國家隊嘅願望冇咗!6月19號就係呢場世紀之戰!我唯有聽Error講波啦。其實我係冇ViuTV收費台嘅,所以我都要諗辦法點樣睇到呢場直播⋯德國隊今次都仲有最鍾意食鼻屎嘅路維做教練,仍然係最勇猛嘅門將紐亞,其餘一半嘅都已經係新血,再唔係踢世界盃嗰班人lu。我自己因為淨係睇國家隊,所以其實都唔係好識佢哋😅不過我可以講吓今年件波衫,主場球衣其實真係唔係幾靚,太subtle啦。網頁話將藝術與運動融合,以畫布為靈感,設計上有手繪細條紋,第一次將國旗顏色放喺手袖上面,男裝$599,女裝$499。至於作客球衣,網站嘅形容都好搞笑,「作客裝備以碳色調含蓄細節設計,展現球隊在國際賽令敵手聞風喪膽的雄姿。」我覺得都可以值得一買,男人着應該幾型,可惜唔見有女裝。點擊圖片放大