德國慕尼黑安聯球場 (Allianz Arena)半日遊 遊覽時間：9:30am - 2:30pm 雖然我淨係睇世界盃，但德國隊嘅球員一般都係拜仁慕尼黑嘅，所以今次特登去咗安聯球場大半日遊，話晒佢係多年德國聯賽冠軍，個球場又咁靚，都好應該去睇下啦。 去之前兩日我已經上網book左，我買嘅係combiticket，即係參觀博物館+導賞團。博物館朝早10點開，所以我預約左導賞團12點15分，時間可以話係啱啱好，當然如果你太沉迷博物館可以俾多一個鐘睇嘅。（by the way, 我去嗰日其實唔多人，基本上即場買飛都OK，不過唔知道導賞團有冇你想要既時間） https://allianz-arena.com/en/tours-and-fcb-erlebniswelt/arena-tours/combi-tour 安聯球場喺離慕尼黑火車中央站只有40分鐘地鐵車程（Froettmaning)，如果有留意嘅話，那些有大型足球場喺附近既地鐵站，會見到個足球公仔標誌喺站名隔離，所以好易認。 同其他球場一樣，落咗車硬係要行十幾廿分鐘先到球場，白色嘅泡泡膠外牆好新穎（2005先開），球場正常見到係白色，有時會變紅色（拜仁慕尼黑隊時），又或者變黑紅金（國家隊時），泡泡膠透明外牆可隱約見到入邊，好正。 博物館入邊有咩睇？其實大家都估到，有好多獎杯，好多球員嘅波衫，好多拜仁慕尼黑球隊歷史，同埋有得同現役球員紙版影相！紐亞、梅拿、利華度夫斯基、洛賓、列貝利。。。點解小豬走左！>.<行兩個鐘其實差唔多，不過鍾意嘅人真係有啲趕趕地，同行冇興趣嘅人，就忍唔住瞓着咗。 導賞團大概一個鐘，重點當然係坐到75,000人既球場介紹，仲有球員更衣室、休息室、健身室，仲有記者室，同埋進場嗰條樓梯啦，佢仲會播埋音樂俾我哋感受一下自己係進場球員！導賞員其實都幾串，見大家唔係fans又冇乜問題（基本上係零問題），忍唔住串咗我哋一野係咪唔識聽英文。之後有人問咗佢一啲巳經講咗嘅內容，佢又話之前講咗啦喎，跟住堅唔再講！不過佢串緊嘅時候仍然都會保持好好嘅笑容㗎。 最後一站當然去MegaStore買嘢啦，但係講真唔係買拜仁球迷真係冇咩可以買，雖然佢都幾多唔同類型物品。 成程兩點鐘玩完，出返去城都未夠三點，仲有大把時間shopping！ 點擊圖片放大 +13
