前一排因為難民問題，加埋一年幾單襲擊連香港都有新聞報導，於是大家對去德國都有D擔心，亦都好多朋友問我究竟安唔安全架。但因為自從難民潮之後我都真係未去過德國，所以一直都唔能夠寫呢一個題目。啱啱上兩個禮拜我先去完德國旅遊，主要嘅地方係遊客區，由杜老塞夫到慕尼黑，除咗第一日自駕遊，其餘時間都係用火車地鐵代步。一般來講，我覺得治安仍然好安全，唯獨去到科隆真係人太多，亦都見到多咗流浪漢同唔係德國人嘅單獨人行嚟行去，所以頓時行街都自己提高左少少警覺，尤其注意係中央火車站。但真係只有提高咗少少，自己嘅銀包同證件全程都仍然擺咗喺背囊，都唔會有人貼近行過自己身邊。所以一般來講，都仲好安全嘅，但如果係恐怖襲擊都冇得驚唔驚。去之前其實都擔心過慕尼黑啤酒節咁多人會唔會出事，諗曬逃生路線，坐邊個位最易走，點知其實入到去實在太興奮，一枝箭走咗去tent正中間最多人嗰啲位坐！話說如此，我而家真係冇再自己夜麻麻喺街行，之前喺德國就算一個人兩三點喺小鎮入邊都好似好安全（可能因為一個人都冇），但係今次就算有三幾個人一齊，十一二點前都其實最好快啲返酒店啦。遊客區感覺上大致良好，就算係高峰期啤酒節都冇乜異樣。總括而然，如果唔係一啲突發野都好安全嘅。 今次我嘅行程係喺十一黃金周，由於同行嘅人未去過德國，所以今次有一大半嘅地方都係一啲大路旅遊景點，再加一啲比較特別嘅環節（其實即係我冇去過嘅地方），譬如行山。當然最緊要梗係慕尼黑啤酒節啦！難得我今次終於有機會夾到時間！我亦透過今次嘅德國之旅希望收集更多新鮮嘅題材同大家分享，今次係第一次去旅行有為我嘅blog搵資料，大家希望可以陸續睇到我啲sharing。 頭尾連搭飛機嘅9日行程如下： ✈️杜老塞夫機場➡️自駕去史特加Ritter Sports朱古力廠+探朋友家➡️行山+慕尼黑➡️慕尼黑啤酒節➡️火車富新天鵝堡➡️地鐵拜仁慕尼黑安聯球場⚽️➡️火車大學城海德堡➡️火車科隆大教堂+購物➡️火車杜老塞夫下午飛機
