正所謂民以食為先, 以飲食嚟做開箱文最好不過了! 因為要帶大小姐去上英文班, 有緣地Uncle Tetsu開賣第一日就可以幫襯了! :mrgreen: 其實呢重即焗嘅cheese cake並唔係咩新鮮事, N年前嘅伊籐家都掀起過熱潮, 當時賣廿幾三十蚊個都大排長龍, 後來都唔見佢嘅踪影..... 排隊大概40分鐘, 本來開業有promtion 用$100就買到signature cheese cake ($59) + angel hat ($59)各1個, 可惜下午5點幾天使帽已經售罊 :-x , 只好買一人限買一個嘅signature cheese cake了...... 到手再返屋企先切開品嘗, 可能係新鮮出爐即入盒嘅關係, 有d倒汗水喺蛋糕周圍, 經過45分鐘路程蛋糕仲保持微暖, 口感比雪芳蛋糕更輕軟, 聞落好香, 食落芝士味唔算突出亦唔漏, 食多2件都唔怕滯。 店家建議12小時內食完就可以室溫儲存, 若然放入雪櫃可以存放3日, 我將剩返一半嘅cheese cake放入雪櫃第2朝再食反而更驚喜, 蛋糕質感實少少好似食雪糕咁, 芝士味又濃返啲無咁淡口, good, 係我杯茶喇!!! :mrgreen: 後記: 一個禮拜後再次到訪, 竟然完全唔駛排隊就買到, 香港人真係3分鐘熱度 :lol:
