由細到大都向港島區活動既我，平日好少到新界區，前幾星期我同朋友講我好想食海鮮，一提到食海鮮....唉，嚟嚟去去都係 鯉魚門, 南丫島, 香港仔又或者西貢，真係有啲悶呀. 咁啱有個住屯門嘅朋友話有幾間好嘢可以推介下. 其中提到老字號"容龍海鮮酒家"同埋相對比較新嘅"喜喜中國廚房". 既然朋友極力推介當然要到屯門行一轉啦！ 我地一行四人經過長長既屯門公路，再轉入青山公路經過黃金海岸終於入到屯門，朋友既車轉再入三聖村停左向一條街，嘩！抬頭一看見到有一個牌坊寫住 “三聖海鮮街”，原來屯門三聖村既海鮮街既海鮮種類十分之多，價錢比起其他地區較大眾化，可能外國遊客少，唔洗俾“老外Tax" ! 我地今次買左美國筒蠔，沙巴超特大老虎蝦，鮑魚，花蟹，大蜆，仲有一條好特別既魚叫臘腸斑， 之後我地再開車去到喜喜中國廚房！ YEAH！！！ 去到喜喜中國廚房，朋友同經理先生交低海鮮再續一安排點去烹調，向我地等候海鮮既時候，經理先生送上一碟叉燒俾我地，原來喜喜中國廚房有一樣十分出名既美 食，就係荔枝柴燒味啦！經理先生話全港只有佢地一家用緊荔枝柴燒叉燒架咋！D叉燒真係好肥美仲有淡淡既荔枝味，真係好特別！值得推介！！！！ 戲肉黎啦！！！！ 先黎第一味就係特大老虎蝦！ 平時食大蝦都係開邊蒸，今次真係第一次試用芝士焗！朋友話只有屯門區先有呢種芝士焗既整法，真係又好似未試過向其他地方食過喎！ 第二味就係砵酒焗生蠔！ OH MY GOD！！真係好味到想大叫 ”好美味呀“！！ 蠔邊脆卜卜，但內裡好鮮甜細滑，比起平時食開既炸生蠔真係好食好多！我已經深深愛上左用砵酒焗生蠔啦！ 第三味係上湯浸大蜆，煮法可能同其他酒樓差不多，無特別驚喜！ 第四味就係我最愛既鮑魚！ 起初以為都係用果皮蒸，點知朋友又俾我一個大驚喜！原來係用頭抽扣鮑魚！味道非常濃郁，鮑魚肉質非常軟滑，估唔到咁短時間都可以咁入味！贊！！！ 第五味就係花雕蛋白蒸花蟹，蛋白有好濃濃既花蟹鮮味仲有淡淡既花雕味道！真不錯！！ 最後就係清蒸臘腸斑！煮法無特別，但魚肉竟然有臘腸既味道！已經食到好飽既我都忍唔住食哂成條魚，真係一D都無浪費食物架！ 今次屯門之行真係好滿足！！！ 下次一定要再到屯門去食海鮮！！朋友話下次同我到容龍酒家一試！記得媽咪提過容龍酒家於1939年開業，至今已超過六十年歷史啦！下次要同埋媽咪一齊去屯門去食海鮮先得！！
