平時係石硤尾去慣文青或者貼地啲嘅打卡地方，第一次去充滿美式風情嘅餐廳。主打美式快餐嘅No Milkshake No Life，餐廳設計同配色上都有種懷舊美式感。店內雖然座位唔多，但設小型等候區，夏天唔怕要出門口排隊變燒豬，真係怕曬人士福音。個人認為奶昔同經典漢堡類都幾值得試，班戟漢堡就可以慳返。和牛芝士太陽蛋漢堡配薯條 $138美式漢堡包身油亮光澤，屬於口感軟身嘅包種。漢堡夾心最吸引一定係呈搖搖欲墜狀態嘅太陽蛋，和牛扒鬆軟厚身，牛味濃郁鹹香。不過薯條稍嫌略鹹，面層調味粉加上薯條自身鹹度，味道淡啲會更好。 無敵美式班戟漢堡 $108嘗試過Hero's Friday班戟漢堡，個人對呢種鹹甜配搭喜好不大，點知呢間嘅組合更衝擊同奇怪。兩塊太陽蛋同厚身班戟層層相間，夾層加入大啡菇同大量煙肉，可隨個人喜好淋上自家製糖漿。班戟口感唔夠綿軟同缺乏蛋香，食落好易滯。太陽蛋加埋辣椒粉同班戟，味道唔太夾，最終都係分開甜鹹食享用。唯一可取只有煙肉算正常，但都略油。大啡菇更係煮得過腍，失去原有韌度。 焦糖杏仁碎百利甜酒 $69作為Baileys甜酒嘅粉絲，當然相當期待呢款奶昔。顏色雖然同皇牌款式相近，但味道明顯帶有奶酒甜香同順滑感，底層混合杏仁碎，口感更為豐富同香口。 皇者焦糖花生醬真脆煙肉 $69作為皇牌奶昔，呢款的確名不虛傳。入口帶焦糖甜香，花生醬令煙肉碎變得似花生碎口感及味道，配搭毫不突兀，但其甜度略嫌飲耐咗會有啲膩感。當日額外加配咗忌廉，打卡一流，質感反而唔太膩。
