灣仔開咗一間以乾花為主題嘅Cafe,開業無耐已經吸引唔少女仔去打卡。食物上價錢整體都比較貴,賣相係唔錯,但大部分味道都幾一般。All day breakfast $158雲集8款菜式嘅全日早餐,食物選材同擺盤上都加入咗少許心思,如模仿青苔嘅大啡菇,迎合店內大自然主題。其他較有特色嘅配料有黑松露炒蛋、車打芝士腸同本地水耕菜沙律,整體味道係新鮮。 最令人費解嘅係bagel真係離奇地硬身,用餐刀平均切成分鐘先切開,咀嚼到牙骹都略顯酸痛。平心而論加上芝士嘅bagel味道係可以,但質感真係需要改善。 Cloud Egg Bagel $78由於一直好奇呢類打卡用食物嘅味道,今次選擇咗雲朵型狀嘅bagel。當中夾有梳乎厘蛋、流心蛋黃、牛油果醬同以柚子汁製成嘅北海道忌廉芝士醬。 梳乎厘蛋比預期遜色,類似食緊微焦嘅無味棉花糖。Bagel理所當然地依然硬身,但比起全日早餐算係好少少。牛油果醬比坊間具有更明顯嘅草青味,未必人人食得慣,個人唔太推薦呢款打卡食物。 Ta-Roffle $128黑竹炭窩夫同店內bagel有異曲同工之妙,質感都有返咁上下堅硬,相較之下窩夫竟然鬆軟幾分。窩夫面層分別配以鹹蛋黃醬同豬肉鬆,另一份配以芋蓉、煙肉同椰菜絲。 店內主張食法係將配料合併當漢堡享用,味道同台式芋泥多士吐司相若。唯一值得稱讚係芋泥份量頗大方,除咗芋蓉,仲夾有芋頭片,味道上唔算特別吸引。