見到靚靚蛋糕總會想買嚟試吓,間唔中口痕發作,但又怕太大舊食唔晒。早前有間網店開咗實體店,試咗佢兩件蛋糕仔,造型同味道上都好得,滿足味蕾之餘仲滿足埋我嘅少女心。 【邂逅】草莓慕絲蛋糕 $48蛋糕以公主為造型,選用士多啤梨為主調,柔和粉色令人愛不釋手。夾層配以草莓慕絲同吉士醬,入口帶酸甜果香,但甜度剛好、唔會死甜。切開會呈現好靚嘅橫切面,每層層次分明。 【永恆】朱古力海鹽焦糖蛋糕 $58呢款頂層原本插有跳舞中嘅公主同王子嘅白朱古力牌,可惜影影吓俾我唔小心破壞咗,不過重頭戲係下方嘅音樂盒造型朱古力蛋糕。注入軟心海鹽焦糖醬後,意外地碰撞出香橙朱古力味嘅感覺。最欣賞係朱古力慕斯做得異常濃郁幼軟滑,但毫不膩口,強烈推薦呢款。