去k11 musea成日經過呢間店，幾乎每次都大排長龍，今次終於決定買返幾件嚟試吓。不得不提店員推住一車車新鮮出爐嘅牛角酥，然後向客人兜售嘅情境，令人聯想起去酒樓食點心啲點心姐姐，好有趣。-Ham Cheese Croissant $42印象中呢款係咁多牛角酥之中最貴個款，老實講我係覺得太貴，但又真係好好食，可能下次經過都係會忍唔住想買。牛角酥出爐時香氣陣陣，好快就比人掃晒。 面層有濃厚嘅焦香芝士，夾心有火腿同大量開胃沙律醬，層次感豐富。完美地將芝士條麵包嘅精粹帶入牛角酥之中，係令人覺得幸福嘅味道。 -Cloud Croissant $28頂層忌廉唧到雲朵般嘅形狀，呼應返包名。綴以點點雜莓碎，比起其他牛角酥款多咗一絲水果香氣。 櫻粉色嘅忌廉比平時食嘅較為挺身同硬實，感覺幾特別，牛角酥香軟吸引，建議即買即食會最好。 -Vanilla Flan $25除咗有人氣牛角酥，呢間仲有賣其他包款同唔太常見嘅甜品，例如呢款Vanilla Flan。 據聞係幾出名嘅法國甜品，見佢幾似布甸就買嚟試吓。入口溫度微涼，口感比想像中厚實好多。 雖然無焦糖燉蛋般嫩滑，但蛋香幾突出，有啲似奶黃包味，感覺翻熱後會更好食。
