一樣，好多食物相之前都有post過，可以用 #野沢溫泉 #野沢食事 搵返出黎。 地圖參考如下 http://www.nozawaski.com/winter/pdf/townmap2016_J.pdf <<日影>> 白樺 Mos Burger ★★★✫ 參考地圖G3 日影扶手電梯一出就係，好方便，樓下係Rental，不過我差不多季尾先第一次黎食，因為冇理由黎雪場食漢堡包家。 話有Set Menu ¥1100以為好抵，但其實只係平果¥20-¥100，而且佢既蛋黃醬同茄汁都要額外比¥50，所以都係搵笨實。佢有個雪場限定豬扒咖喱漢堡，但我點完蝦排漢堡先見到囉。 其實間野係咪快餐黎家，等咁Q耐既?! 原本諗住唔推介呢間，不過亦因為即叫即整，所以個Burger同薯條都係新鮮滾熱辣，係幾香脆既，所以如果食厭左親子丼燒肉飯咖喱飯拉麵... 呢個都係唔錯既選擇。 唔知點解覺得平¥100好少，但如果係平$7蚊我又覺得唔錯。 每人消費約¥1100 カフェ＆レスト オリーブ Cafe & Rest Olive ★★★ 參考地圖G3 間餐廳有塊黑板畫佢lunch有既款式，但我真係睇唔明佢晝咩。 諗住喺度食Kimchi飯有D錯，既然要試新野就試餐牌no.1，點知個Taco飯仲錯，唔係難食，但硬係覺得怪怪咁。炸雞(飯)唔錯，但個醬汁我唔識形容。 除左lunch黎過一次之外(務求試新野)，我食過好幾次雪糕，都係兩溝味最夾。試過貴D既Waffle cone(¥400)，點知仲衰過平D果個，不過講雪糕筒都係上ノ平山莊果個夠香脆好味。報告完畢 Lunch消費約¥1300 雪糕¥350-400 One Day(St. Anton) ★★ 參考地圖G3 黎野沢食Fish and Chips好似怪怪地咁，因為季初冇乜餐廳開所以選擇唔多，所以焗住食，味道一般。 每人消費約¥800 三井食堂 ★★★★★ 參考地圖G3 燒肉飯好味，担担麵亦唔錯。 平、靚、正 完。 每人消費約¥1000 グリーンハウス マルトミ Green House Marutomi ★★★✫ 參考地圖H3 醬油炸豬排飯唔錯夠香脆，芝士飯都好味，食一兩次覺得OK，不過食多幾次就覺得愈食愈咸，都係少食為妙。 每人消費約¥800 久保田食堂 ★★ 參考地圖G3 (地圖冇標 雪場地圖亦冇寫) 呢間其實喺日影Ski School後面，搭moving walk會經過見到，但喺雪場行去就十分唔就腳，所以冇咩遊客會黎，雖然都係果幾十步腳程。 試食兵團最鐘意咩都試試試試試，無論明知賴野都要一試。見個鍋好似好勁咁，其實好一般冇特別，吸引唔到我黎二次，個飯就更加唔駛講啦。 每人消費約¥1000 ユートピア食堂 Utopia ★★★✫ 參考地圖I3 原本覺得呢間係另一個雪場餐廳推介，因為多款式，味道都唔錯，仲有漬物任食添。不過有雪友反映話好多味精，所以... 減半粒星啦。 可達度一般，一係黑紅線落黎，一係滑好L耐綠線先到。 個人消費約¥1000 上ノ平山荘 Uentaira Sanso ★★★★★ 參考地圖I5 繼三井食堂另一間大推既雪場餐廳，可以一去再去。呢間仲有更多選擇，係唯一一間未食厭(住)既餐廳。 因為叫左個set 送左幾條薯條而發現佢D薯條新鮮炸好好味(因為有好多都係炸定就咁放喺個櫃度好鬼難食) 滑蛋吉列飯正，不過個豬腸係屬於又腍又散果種，所以我覺得麻麻地。 雪糕有好幾款，個cone夠香脆係我鐘意食果種。同場仲有¥250任飲汽水都算抵，隻隻飲勻晒真係好玩 個人消費約¥500-1500 はくぎん Hakugin ★★★ 參考地圖I5 又唔係唔好味，但又講唔上好味。 個雞既味就好似日式港版南乳咁，燒肉飯一般，不過未算係最hea果間。 每人消費約¥1000 太郎小屋 ★★✫ 參考地圖I5 燒肉飯一般，炸雞OK但唔係新鮮炸。 每人消費約¥1000 パノラマハウス ぶな Panorama House Buna ★★★ 參考地圖I5 野食冇乜特別，上次去係天晴，個view唔錯，邊食野邊欣賞風景係一件美事。 每人消費約¥1100 ロッジ でんべえ Lodge Denbey ★★★★✫ 參考地圖H2 間野都好味既，不過就少氣左D囉。話說其中一位用餐者有季票，咁喺特定既餐廳會有9折或送野飲，到我地埋單既時佢問持票人係點左邊樣野食，冇話佢唔啱，不過你唔比一個人食3樣野家咩?! 真係搞笑，其他餐廳都冇問過。 每人消費約¥1100 上ノ平ロッヂ Uenotaira Lodge ★★★ 參考地圖I6 日影Gondola一出右手面，即使唔滑雪都可以搭上去雪場食餐飯，係少數提供wifi既餐廳。 關東煮唔錯，蘋果味軟雪糕口感唔係杰同滑果種，似打碎左既沙冰咁。咖哩飯、燒肉飯、炸雞、薯條就一般冇特別。 每人消費約¥1000 <<長坂>> レスハウス やまびこ Rest House Yamabiko ★★★★★ 參考地圖H9 推介牛扒野沢菜飯，溫泉蛋意粉都唔錯。而佢另一個推介野沢菜雞肉Pizza都幾抵食夠二人份量。仲有個250g 每日限定30份既steak好似好勁咁，真係兩個女仔都夠食呀。 不過薯條唔係見佢新鮮出爐既話唔建議買，因為我食左個又凍又腍既薯條。冇錯，我真係好鐘意食著條。 其實佢D炸物就真係唔使再試啦，個朱古力cake都係一般唶。 每人消費約¥900-2500 睦ジュエ Mutsumi Jouer ★★★★★ 參考地圖G7 由於三年食過一次又咸又大碗既拉麵食到怕怕唔敢再黎，不過朋友仔話要食呢間我唯有跟隨，但比個機會人地即係比個機會自己，呢個講法係冇錯既。 今次點飯set完全唔同，味道唔錯，即刻要同佢平反。先黎麵豉湯任飲，其實我個人對麵豉湯冇乜好感兼且飲到厭，但估唔到呢個免費湯我仲添飲 ，飯仍然係咁大碗，男士胃口大應該可以KO佢。 是次消費每人約¥1000 食処 河廣 Kawahiro ★★★ 參考地圖H7 三年前我覺得呢間野OK，點咩都唔錯，可惜今季我覺得咩都麻麻。如果要嚴格來講蕎麥麵唔係好味，燒肉飯洋蔥多過碎肉片簡直揸流攤，三井果個好味好多。 每人消費約¥1000 <<柄沢>> 柄沢食堂 ★★ 參考地圖D11 真係以試食心態去，真係冇乜特別，真係唔會去第二次。 每人消費約¥950 好野，出發前搞掂晒。 宜，仲有酒吧未介紹，唔知大家有冇需要... 下星期就出發去斑尾(教)滑雪，如果想認識滑雪或睇多D靚靚雪景相，歡迎瀏覽 https://www.facebook.com/snowmonu
